Shillong, Jylliew 20
Ki shipai khappud jong ka Border Security Force (BSF) ha ka Sngi Thohdieng ka 20 tarik Jylliew, 2025, ki la aiti noh ïa ka met jong uwei u briew uba dei na Bangladesh hadien ba la lap ba la sdien ha uwei u dieng uba don mar shiliang jong u pud ka Jylla Meghalaya, sha ki shipai ka Border Guard Bangladesh (BGB) lyngba u khappud Utma.
Une uba la khlad noh u dei ba la tip kyrteng kum u Zakaria Ahmed, 25 snem ka rta bad u dei khun jong u Alauddin na ka shnong Lama kaba don ha Uttar Ronikhai jong ka Sylhet Companiganj upazila.
Utei u briew u dei uba trei kum u nongbylla bad u dang shu dep ban shongkurim tang kumba saw sngi ha shuwa ban lap ïa ka met jong u.
Ïa ka metïap jong utei u briew la sei ha ka por kumba 9:30 baje mynmiet jong ka Sngi Palei ka 19 tarik Jylliew lyngba ka Thanat Pinarsala ha Meghalaya, India. Hadien kata na ka liang u BGB u la aiti noh ïa ka met sha ki pulit ka Companiganj ban leh ïa ki kyndon aiñ, ong u Ophisar in-Charge (OC), Uzair Al Mahmood jong ka S Companiganj.
U Lt Col Nazmul Haque, Commanding Officer ka BGB Sylhet 48 Battalion, u la ïathuh ba katei ka jingjia, ka dei hapoh ki jaka jong ka ri India, kumta ki pulit ka Bangladesh, kim shym la lah satia ban leit sha katei ka jaka.
“Namar ka jingsniew ka mariang, ki pulit ka India ruh ki la mad ïa ka jingdkoh ban poi sha katei ka jaka. Hadien ba la dep leh ïa ka post-mortem ki BSF ki la aiti ïa ka met sha ngi,” u la ong.
Katkum ka jingtohkit ba nyngkong ka pyni ba u Zakaria u lah ban ïap da kaba pynïap ïalade na ka daw shimet, la ong u heh jong ka BGB.
Ki nongshong shnong ki la ïathuh ba ki la ïohi ïa ka metïap ba la sdien ha uwei u dieng sha liang ka India ha khappud hajan ka shnong Lama, kaba jngai kumba shiteng kilomitar na ka ïing jong u Zakaria bad hajan u mawjam khappud 1257.
Hadien ba la pyntip da ki nongshong shnong, ki pulit BGB bad ki pulit Bangladesh ki la pyntip sha ki BSF bad ki bor sorkar India, kiba hadien ki la sei ia katei ka metiap.
U mama jong u Zakaria, u Gias Uddin, u la ujor da ka General Diary (GD) sha ki pulit jong ka Companiganj, hadien katei ka jingjia.
Na ka liang u kpa jong u Zakaria, u Alauddin, u la ong, “U khun jong nga u la shongkurim ha ka sngi Nyngkong. Kam shym la don kano-kano ka jingïakynad ha ïing ha sem. Ngi la ïabam ja miet lang ha ka miet jong ka Sngi Balang. Ha ka step jong ka Sngi Palei, ngi la lap ba u la jah. Hadien, la pyntip sha ngi ba la lap ïa ka met jong u kaba la sahkut ha u dieng sha shiliang pud.”
