Shillong, Jylliew 20
Ka Khadsawphra College kaba don ha Mairang, Eastern West Khasi Hills ha ka Sngi Thohdieng, ka 20 tarik u Jylliew 2025 ka la rakhe ïa ka jingdap 10 snem jong ka jingseng ïa ka Higher Secondary School naduh ba la seng ha u snem 2015.
Ha kane ka sngi la ïadonlang u Bah F.R Kharkongor, IAS bad Principal Secretary ka tnat Arts and Culture ka Sorkar Jylla uba long kum kongsan ha ka jingdonlang u Principal kane ka kolej Bah Boldness Nongum, Pastor, Sordar jong kane ka shnong ha ryngkat ki khynnah pule, ki kmie ki kpa bad ki nongshah khot sngewbha.
Ban pynphuh-pynphieng shuh shuh ïa kane ka prokram rakhe dap 10 snem, ki khynnah pule jong ka Khadsawphra College ki la pyni ïa ki sawangka (drama) shaphang u Ramhah, u Lum Kyllang bad u Lum Symper, bad ka khana shaphang ka Umñiam bad Umngod.
Ha kane ka sngi la ïoh ruh ka jingkren na u kongsan Bah F.R. Kharkongor ha kaba u la kyrkhu-kyrdoh ïa kane ka kolej bad ba U Blei un don ryngkat bad kane ka kolej bad khamtam ïa ki khynnah pule nangne shakhmat ban long ki atiar ban tbeh jingshai ha ka Jylla.
La ïoh ruh ban sam ïa ki khusnam sha ar ngut ki khynnah pule ba la pass bha ha ka eksam ba la dep.
Haba kren lyngkot ha kane ka sngi, na ka liang u Principal ka kolej, Bah Boldness Nongum, u la ïathuh ba la seng ïa kane ka kolej ha u snem 2015 bad mynta ka la dap 10 snem thik ha une u snem 2025.
U la ong ba ka jingrakhe ka kolej ïa ka jingdap 10 snem ka Higher Secondary Section ka long ban pynsah jingkynmaw bad ruh ban plie lad ïa ki khynnah skul ba kin lah ban shim bynta ha rynsan ban pyni ïa la ki sap.
Halor ka jingleh drama jong ki khynnah pule, u Bah Boldness u la ong ba ki dei kiba la shna khana ha ka liang ka dustur u Khasi ha kaba la kren da ka ktien English khnang ban pyni ruh sha kiwei ki jaidbynriew ba kin tip ïa ka khana puriskam jong ka jaidbynriew Khasi.
U la ïathuh ruh ba ha ka por ba sdang nyngkong ïa kane ka kolej ki don tang kumba 48 ngut ki khynnah hynrei haduh mynta ki la don haduh 616 ngut da kaba bynrap ruh ba ka kolej ka la kiew bha ha ka liang ka jingpass bha ki khynnah.
“Kane ka skul ki don ruh ki khynnah kiba don jingduna ha ki dkhot met nangta ki khynnah kiba wan na ka ïing ka sem kaba duna ha ka ïoh ka kot ki wan lut ha kane ka kolej namar ba ka kolej ka ai ka jingïarap na ka bynta kito ki khynnah kiba wan na ka longïing kiba duna ha ka ïoh ka kot,” u la ong.
Kumta, u Bah Boldness u la kyrpad ruh ïa ki paidbah nongshong shnong ka Mairang ba kin wan ban ïashim bynta ban peit ïa ki jingpynbyrngia ba ak da ki khynnah skul ban sa pyni sa lashai ka Sngi Saitjaiñ ha ka por 3 baje bad 4 baje janmiet. U la bynrap da kaba ong ba ki paidbah kiba kwah ban wan kim dei ban khuslai shaphang ka jingsiew hynrei tang ban ïa ai katba ki lah bad ki bym lah ruh ki lah ban wan peit ei.
