Shillong, Jylliew 20
U Chief Secretary (CS) jong ka Jylla, Bah D.P Wahlang ha ka Sngi Thohdieng ka 20 tarik u Jylliew 2025, u la ïathuh ba un sa aiti ïa ki jingai jingmut bad ïa ki sienjam ban sa shim da ka Sorkar Jylla haba ïa dei bad ka kaiphod jong ka Expert Committee on the State Reservation Policy hapoh ka 30 tarik u Nailar.
Lah ban kdew hangne ba ha ka 13 tarik u Jylliew 2025, ka kynhun Myntri Sorkar ka la bynshet ha u Chief Secretary ban pule bniah ïa ka kaiphod ba la aiti da ka Expert Committee kaba bishar bniah ban pynkylla thymmai ïa ka bhah thung kam ha ka Jylla.
“Dang shen ka kynhun Myntri Sorkar ka la bynshet ha nga ïa ka kam ban pule bniah ïa ka kaiphod jong ka Expert Committee bad hadien ba nga la pule bniah ngan sa aiti ïa ka kaiphod hapoh ka 30 tarik u Nailar,” la ong u Bah Wahlang.
Ka Expert Committee kaba khlieh da u Justice (Retired) Mool Chand Garg, ka dei kaba la thung da ka Sorkar Jylla ha ka 12 tarik Nailur 2023, ban bishar thymmai ïa ka bhah thung kam ha ka Jylla hadien ka jingdawa ban pynkylla na kiba bun balang.
