Shillong, Jylliew 20
U Rangbah Shnong Nongrah, Shillong, Bah Denis Lynrah u la ïathuh ba ka shnong kam don jingtip eiei halor ka jingjia shah pynïap jong kawei ka kynthei ha u lok namar ki trai ïing kiba ai wai ki khlem wan pyntip sha ka shnong.
Haba ïakren lyngba ka phone, u Bah Denis u la ïathuh ba shu bna ba kine shikurim ki la wan sah wai kumba shi bnai eiei shwa ba kan wan ka jingjia ba sngewsih.
U la pyntip ruh ba ka shnong ka ju bthah ïa ki trai ïing ba ki dei ban da pyntip sha ka shnong hynrei ïa kine ki briew kiba sah wai ym don ba wan ban pyntip.
“Ka shnong kam don ka jingkitkhlieh lada jia eiei lada ki trai ïing kim wan pyntip ïa ki nongshong wai,” u la ong.
U la ïathuh ba u bna ba kawei ka kynthei ka la shah pynïap ka dei ha ka 30 tarik Jymmang 2025.
Kum ban shu pynkynmaw ka Priya Khongstia kaba don kumba 24 snem ka rta kaba dei na ka shnong Umñiuh Tmar ka la ïasah lang bad la u lok ba la tip kyrteng kum u Donald Sohtun uba don kumba 30 snem ka rta na ka shnong Mylliem Mawpynthih kiba la sah wai ha Nongrah Nonglum Brei.
Hynrei kane ka kynthei ka la ngat ha ka apot kaba sngew shyrkhei bha ha kaba la kynnoh ba u kurim jong ka u la dkhat jubor ïa ka jingim jong ka da kaba ksih na ryndang bad tied na khlieh haduh ba kan da mynsaw jur bad khlad noh shisyndon na kane sla pyrthei.
Hadien pat ynda u kurim jong katei ka samla u la dep leh ïa katei ka kam la kynnoh ba u la sop ïa ka metïap ha ka ‘blanket’ bad ban buh ha ïing kumba katto-katne sngi eiei.
Katkum ka jingbatai ki bahaïing jong ka Priya ki la ïoh ban phone khatduh ïa ka ha ka 25 tarik u Jymmang bad naduh katei ka sngi ka khlem phone shuh sha ïing.
Ki bahaïing ki la kynnoh ba u lok jong ka Priya u la phla ha ki pulit ba u la don ka jingtharai sniew ïa ka kaba pynlong haduh ba un shim noh shisyndon ïa ka jingim jong ka.
