Phla ka Canada ba ki lehnoh Khalistan ki thmu ban thombor nyngkong eh ïa ka India

Ottawa, Jylliew:

Ka tnat wad bniah ba ha khlieh-duh jong ka ri Canada, ka Canadian Security Intelligence Service (CSIS), ha kane ka por pat ka la pynpaw paidbah bad phla ha ka sien nyngkong eh, ba ki lehnoh Khalistan ki dang bteng ban pyndonkam ia ka khyndew jong ka Canada kum ka nongrim ban kyntiew, ban lum pisa bad ban wanrah ia ki kam thombor kiba thmu nyngkong eh ia ka ri India. Ka kaiphod ba thymmai jong katei ka tnat, ka pynpaw shai ba ki lehnoh Khalistan ki dang iai bteng ban pyndonkam ia ka Canada kum ka jaka ban pynshlur, ban lum pisa ne ban thmu ia ki kam thombor khamtam eh ha India.

Kane ka jingpynpaw, kaba dei shi bynta jong ka kaiphod khatduh jong ka CSIS, ka la pynmih biang ïa ki jingsngew-khia halor ka jingwan rung ki bar ri bad ki kam lehnoh hapoh ka Canada, khamtam eh haba iadei bad ka jingïadei bad jing-iatreilang jong katei ka ri bad ka India.

Naduh katto-katne snem ba la leit ruh ka India ka la pynpaw ïa ka jingsngewkhia halor ki lehnoh Khalistan kiba treikam na ka khyndew jong ka Canada, hynrei kiba ka Canada ka la leh matlah bad kyntait ban shimkhia haba iadei bad kane ka kam.

Hynrei mynta ka tnat ïada ri jong ka Canada hi ka la pynskhem ïa kaei kaba ka New Delhi ka la pynneh slem bha bad ong ba ka Canada ka la kylla long ka jaka rieh na ka bynta ki ‘riew pyrshah India bad ba ka sorkar Canada kan ym ailad shuh ia kum kine ba kin wan jia nangne shakhmat. Kumta la ong ba kane ka long ka sien ba nyng-kong eh ba ka Canada kan pynbna ia ka jingpyrshah ia ki jingthmu bad ki kam jong ki lehnoh Khalistan.

Ka CSIS ka la tohkit ia ki kam kiba ap jingma ia ka jingshngaiñ jong ka ri Canada, kumba la kdew ha ki aiñ jong ka CSIS.