Jowai, Jylliew 20
Ka lehniam Kñia Khang ka dei kawei na ki jingkñia ainguh aidem ba shisien shisnem da ka Raij ka Shnong ïa ki ‘Soo Dwar-Soo Luti’ bad ka ‘Tawiar Takan’ kiba long ki ‘Lei Shnong ‘Lei Raij kiba la wan katkum ka hukum Blei naduh ki kulong kumah ban long ki nongda nongker ïa ka shnong ka Raij na ki jingroi jong ki jingsniew ka pyrthei, ka mariang kiba wan ha ki dur bad ki rukom bapher bapher.
Shwa ban poi kane ka sngi ‘Kñia Khang’ kiwei ki jinglehniam ba hap ban pyndep da u Doloi, u Langdoh, u Pator, ki Sangot, ki Wasan bad ki Kñi na ki Phra Kur Phra Kmai ki long ka Dihsoopen ha ïing Langdoh bad ka Kbai Mooknor hakhmat ka ïew ka Syiem hakhmat ki nongshong ïew shong hat bad ki nongwan ïew wan hat.
Ïa kane ka lehniam la pyndep ha ka 20 tarik Jylliew bad ka jingmut jong ka, ka long ban ainguh aidem na ka bynta ki jingkyrkhu kiba ka shnong ka raij ka la ïoh da ka jingïada jong ki ‘Lei shnong-‘Lei Raij kiba long u Mookhai, Mooralong, Moosniang, Mootong bad ka Tawiar takan ne wah Myntdu.
U Doloi ka Elaka Jowai u Waheh Puramon Kynjin haba ai jingkren ha ka jingïadei bad kane ka lehniam, u la pynpaw ka jingsngewnguh kaba khraw ïa baroh ki khun ka shnong ka raij, ki nongshong ïew shong hat hapoh ka Raij Jwai kiba la noh synñiang da ka mynsiem jong ka jingsngew burom bad ïa ieit para nongshong shnong na ka bynta ka jingthmu ba bha jong kane ka jingpyndep niam bad kyrpang ïa ki ‘Lei Shnong-‘Lei Raij kiba la da la ker miet la bad sngi bad ka shnong ka thaw ka la ïoh ïa ka shongsuk shongsaiñ, ka im miat im bha bad ka roi ka par.
