Shillong, Jylliew 20
Ïa ki sap bad ki jingjop jong u briew ha ki kam babha ym dei ban buhrieh ne leh klet hynrei dei ban don ka jingithuh bad ka jingburom ïa ki kum ka mynsiem ban kyntiew shuh-shuh ïa ki.
Da kane ka mynsiem, na ka liang ka Jubilee Presbyterian Secondary School Mawryngkneng ka la pynkup burom ïa u Bah Headingson Ryntathiang, uba dei u ‘riew pawkhmat uba don ïa ka sap bad uba la noh synñiang shikatdei eh ha ka liang ka thoh ka tar bad ka put ka tem Khasi.
Ïa kane ka jingpynkup burom la pynlong ha ka 20 tarik u Jylliew, ha kajuh ka sngi ba ka skul ka la rakhe ïa ka sngi Thomas Jones Day, ban kynmaw burom ïa u nongprat lynti bad u kpa jong ki dak thoh Khasi, bad ruh ban rakhe ïa ki jingjop jong ki khynnah kiba leh bha ha ka eksamin matrik MBOSE.
Ka skul ka la pynpaw ba ka jingpynkup burom ïa u Bah Headingson ka dei ka jingithuh ïa ki jingnoh synniang kiba shlur jong u, na ka bynta kane u la ïoh ïa ki jingïaroh na ka Sorkar Jylla bad ka Sorkar India. Ïa kane ka jingai burom la pynïaid da u Bah Pyndapbor Lawrniang, uba la ïasam ruh ïa ki jingshemphang halor ka jingïaid lynti jong u Bah Headingson naduh ba u dang rit haduh mynta.
Ïa u Bah Headingson Ryntathiang la kha ha ka 24 tarik Nailur 1942 ha ka shnong Nongrymmai, West Khasi Hills. Hadien ba u la san, u la shong la sah ha Jaïaw Lumsyntiew, Shillong, ha kaba u la pyndep ïa la ka jingpule. U la trei ha ki ophis Sorkar bapher bapher ha kylleng ka Jylla Meghalaya bad Assam bad u la shongthait noh ha u snem 2005.
Ha ka liang ka put ka tem, u la sdang ban rwai lyngba ka jingdon ha ki kynhun rwai balang bad ki concert ha Shillong bad shabar. Ha ka snem 1965, u la ïoh ïa ka kyrdan “A” na ka All India Radio (AIR), bad ha ka snem 1988, u la ïoh ïa ka kyrdan Top Grade Artist – ka jingithuh kaba ha khlieh duh kaba la ai da ka AIR. Ha ka jingim jong u, u la rwai bad tem ha palat 820 tylli ki jaka tem ha kylleng ka ri India.
Ha u snem 2016, ka Election Commission jong ka ri India ka la ai khusnam kyrpang ïa u na ka bynta ki jingnoh synñiang jong u ha ka put ka tem bad ka jingïatreilang bad ki paidbah. Haduh mynta, u la ïoh bun ki burom kiba donburom ha ka kyrdan jong ka jylla bad ka ri baroh kawei.
