Beijing, Jylliew:
Ka tnat kam bar ri jong ka China ha ka Sngi Palei ka la pyntip ba ka China ka la ioh ban pynkynriah ia kumba 1,600 tam ki nongshong shnong na Israel bad Iran namar ka jingiakynnad hapdeng kine ki ri kaba la bteng hynñiew sngi tam mynta.
Kumta katei ka tnat bar ri jong ka China ka la ialeh ban pynkynriah noh ia la ki paidbah khnang ba kin lait na kino-kino ki jingma na katei ka jingiakynad jong kitei ki marjan ri.
Hynrei, ka China ka la kyntu pat ia kitei ki ri, khamtam ia ka Israel, ba kan sangeh noh shi syndon ia ka jingiakynad naba ka jingiakynad jongki ka la wanrah jingma ia ka pyrthei baroh kawei.
Ka Israel ha ka Sngi Palei, ka la ther ia kawei ka shlem Nuclear ba kongsan jong ka Iran bad ki namding jong ka Iran ki la ther ia kawei ka jaka sumar jong ka Israel hadien ba ka jingiakynad hapdeng jong ki ka la nang jur bad nang iai bteng mynta la kumba shi taïew.
Kumta, ka tnat Embassy jong ka China ha Iran ka la khot ïa ki nongshong shnong jongka baroh ba kin mih noh na katei ka ri.
Haba iadei bad kane, ka tnat Embassy jong ka China ka la ai jingmut ia ki paidbah nong China, ba ki lah ban leitphai sha la ri da kaba kin leit da ki liengsuiñ na Iran ki ban ïaid lyngba ia ka Turkey, Armenia lane lyngba jong ka Iraq.
Ha ki khyndiat kynta jong katei hi ka Sngi Palei, ka tnat Embassy jong ka China hapoh Israel, ka la ong ba kan sdang ban pynkynriah noh ia ki briew jongka da ki kynhun naduh ka Sngi Thohdieng, ha kaba kan rah shuwa ia kito kiba kwah ban mih sha Taba Border Crossing sha Egypt lyngba ka bus, kaba jngai kumba 360 km na Israel.
