Guwahati, Jylliew:
U Myntri Rangbah ka Assam u Himanta Biswa Sarma ha ka sngi Balang u la sam ïa ki shithi thungkam sha ki 400 ngut ki ophisar ka tnad ka koit ka khiah kiba dang shu shah thungkam thymmai, da kaba pynksan ïa ka jingaiti jong ka sorkar jong u ban thaw ïa ki lad kamai bad ban pynbha ïa ka lad ai jingsumar ha ka jylla.
Ha ka jingai jingkren ha ka jingïalang kaba la long ha Guwahati, u Sarma u la pynbna ba kane ka jingpynrung kam ka rah ïa ka jingdon jong ki kam sorkar ba la ai ha Assam sha ka 1,20,359 tylli, kaba la pynjan ïa ka jylla sha ka thong jong ka ban don palat 1.5 lak tylli ki kam na ka bynta ban shakri paidbah.
U Sarma u la pynpaw ïa ka bynta kaba kongsan jong ki ophisar ka koit ka khiah ba thymmai ha kaba pynkhlaiñ ïa ki jingshakri ha ka koit ka khiah ha ki jaka paidbah.U la kdew ba kine ki jingthung ki ïahap bad ka jingkular jong ka sorkar ban pynpoi ïa ka jingsumar pang kaba bha wat sha ki jaka ba jngai tam na ki jaka sor.
U la batai ïa kane ka jingthmu kum ka sienjam kaba kongsan ban weng ïa ki ar tylli ki mat ba kongsan jong ka jingpynmih kam bad ka jingïoh ïa ka jingsumar kaba kham bha. U Myntri Rangbah u la kren shaphang ka jingkiew kaba phylla jong ka Assam ha kaba pynduna ïa ka jingïap jong ki longkmie bad ki khunlung ha kine ki snem ba dang shen.
U la kdew ba ka jingïap jong ki longkmie ka la hiar na ka 480 tylli ki jingïap na ka 100,000 ngut ki khunlung ba dang kha ha ka por ba u long Myntri ka koit ka khiah sha ka 167 ngut mynta. U Sarma u la pynpaw ba ka Assam kan sa ïaryngkat bad ka jingdon jong ka jingkheiñ kaba biang kum ha ka ri ha ki lai ne saw snem ban wan.
