Shillong, Jylliew 20
Hadien 12 sngi ba ka la shah rem ha ka French Open, ka Aryna Sabalenka kaba don ha ka kyrdan nyngkong jong ka pyrthei ha ka jingïalehkai ‘tennis’ ka la wanphai biang da ka jingjop haba ka la pynkut ïa ka jingïalehkai jong ka wat ba ar pyrshah ïa ka Rebeka Masarova ha Berlin ha ka Sngi Palei da 6-2, 7-6 (8/6). Ka jingïalehkai ka la shah pynsangeh noh hadien ka ‘set’ nyngkong ha ka Sngi Balang bad la pynlong ïa kane ka nong Belarus ban trei shitom ban sdang biang namar ha ka jingïakhun bad ka Masarova na Sweden kaba don ha ka kyrdan 112 ka la poi shaduh ka ‘tie-breaker’. Kane ka jingjop ka la pynpoi pat ïa ka sa sha ka quarter final katba ka dang lah ban pyntbit bha ïa ka rukom lehkai jong ka ha ka madan ka ban long ruh ka jingpynkhreh na ka bynta ka Wimbledon ka ban sdang hadien 10 sngi.
Ka Aryna Sabalenka kan sa ïakhun pyrshah ïa ka Elena Rybakina jong ka Kazakhstan kaba don ha ka kyrdan 11 lane ka Katerina Siniakova ka nongïalehkai ‘doubles’ jong ka Czech ha ka jingpyrshang ban rung sha ka kyrdan ba saw ha Berlin ha ka sien kaba nyngkong ha ka kam ïalehkai jong ka.
Ha ka jingïalehkai ba nyngkong jong kane ka sngi, ka Marketa Vondrousova, ka nongjop jong ka Wimbledon ha u snem 2023, kaba don mynta ha ka kyrdan kaba 164, ka la pynliem noh ïa ka Diana Shnaider jong ka Russia da 6-3, 6-7 (3/7), 6-3. Kane ka nongïalehkai kan sa ïakhun pyrshah ïa ka nong Tunisia ka Ons Jabeur, ka nongïalehkai kaba la jop pyrshah ha ka phainal jong ka Wimbledon ar snem mynshwa.
