Shillong, Jylliew 20
Ka Meghalaya Swimming Association (MSA) ka la ai kitbok-kitrwiang ïa ki 5 ngut nongjngi jong ka synjuk ki ban leit mihkhmat ïa ka jylla sha ka jingïakob jngi ba la tip kum ka 78th Senior Swimming Championship 2025 ka ban long ha Bhubaneshwar, Odisha.
Kine san ngut ki nongjngi ban mihkhmat ïa ka jylla sha kane ka jingïakob ki long u Cleric Jayden Wanniang ban ïakhun ïa ka 50 & 100 meters Breaststroke, Shuan Maxwell Diengdoh ha ka 100 & 200 meters Free Style, Anahad Alawat ha ka 50 meters Free Style bad 50 meters Back Stroke, Sumarbiang Mawlong kan ïakhun ïa ka 100 meters Free Style & 50 meters Breast Stroke, Nazareen Parïong 50 meters Free Style bad 50 meters Butterfly.
Ha shwa ba kane ka kynhun kan mih ban leit ïakhun sha katei ka lympung, ka la don ka jingïakynduh lang ha pung jngi Crinoline, ha kaba la wan ban ïadon lang ki dkhot ka MSA hapoh ka jingïalam Bah Ian Lyngdoh kum President, Secretary Bah Baika Lyngdoh bad kiwei pat ki dkhot lem bad ki kmie ki kpa jong ki khynnah.
Haba kren bad ki nongthoh khubor, u Bah Ian u pynpaw ba kane ka long sa kawei pat ka kabu ksiar ïa kine 5 ngut ki khynnah ba kin ïoh ban leit ban ïashim bynta sha kane ka jingïakob, da kaba u la pyntip ba kine kiba leit ïashim bynta sha kane ka lympung, ki dei ruh ki khynnah kiba kum ka synjuk ka la dep ba kan jied lypa ïa ki bad kumjuh ïa kiwei pat ba kin long kum ki nongïalehkai ki ban dang shah pyntbit shuh-shuh ïalade ban mihkhmat ïa ka jylla ha ka por ba ka pynlong ïa ka National Games kaba 39 ha u snem 2027 ka ban long ha kane ka jylla.
U Bah Ian u pynpaw ruh ba kum ka synjuk kam khmih lynti than na kine ki khynnah khamtam ïa katta ka jingjop, pynban u sngew ba ka jingïoh lad ban ïashim bynta ka jong ki, khlem pep kan ïai phrang bad ba kan saiñdur ïa ka jingim ïalehkai ka jong ki.
Nalor katta, u la bynrap ba na ka liang ka synjuk ka la dep ba kan phah ïa la ka jong ka kaiphot kaba ïadei bad ka jingpynkhreh ka jong ka ban sei madan ïa ki samla ban mihkhmat ha ka National Games ha u snem 2027, kaba ha kane ka kaiphot, ka synjuk ka la thoh shai ïa kiba bun ki jingdonkam.
