Nongstoiñ, Jylliew 22
Uwei u briew ba la tip kyrteng kum u (L) Silbelius Kharbani (59 snem ka rta) u la khlad noh namar ka jingmynsaw hadien ka jingïakhun bad uwei briew ba la tip kyrteng kum u Pranding Nongkhar (54 snem ka rta).
Ka tyllong khubor na u Superintendent of Police ka WKHD, u B.D. Marak ka ong ba katei ka jingjia ka la jia ha ka Sngi U Blei ha kawei na ki jaka hajan ka shnong Mawkhlam bad ki pulit ki la ïohpdiang ïa ka jingpyntip ha ka por kumba 4.50 janmiet.
Ka khubor na u SP ka ong ba kitei 2 ngut ki dei ruh shi kynum kiba na ka shnong Mawkhlam Nongpyndeng bad katei ka jingjia ka la mih hadien ka jingïakajia hapdeng jong ki ha kaba la ong ruh ba baroh 2 ngut ki la ïashoh khawiang.
Shuh shuh la ong ba halor katei ka jingjia na ka liang jong ki pulit ka Crime Scene Unit na ka Directorate of Forensic Science, Shillong ki la wan ban pynlong ïa ka jingwad bad tohkit bniah halor katei ka jingjia, katba uba suba nongpynïap u la don ha ka kti jong ki pulit ban pynlong ïa ka jingtohkit.
