Shillong, Jylliew 22
Ka kol ba la thep da u Michael Olise ha ka minit kaba 84 ka la biang pura ïa ka Bayern Munich ban pynliem noh ïa ka Boca Juniors da 2-1 kol ha Miami Gardens, ha kaba katei ka kynhun ba khlaiñ bor na Germany ka la ïoh jaka ban rung sha ka pre-quarter final jong ka Club World Cup.
Hadien ka jingïakhun ha ka jaka jong ka penalty, u Harry Kane u la ïarap ban pynbuh bol na ka bynta u Olise, u bym shym la pynlehnohei ïa kane ka kabu ksiar na ka bynta ban pynkhih jar kaba la pynbthei ia ka bol sha ka liang ba shapoh kadiang jong ka kol.
Ha kane ka jingïakhun ka Bayern ka la ïoh ban pynkhih jar nyngkong eh ha ka minit kaba 18 lyngba u Harry Kane, hynrei dei ha ka minit kaba 66 jong ka kylla miet ba ka Boca ka la lah ban pynïakhaid kylla lyngba u Miguel Merentiel.
Lyngba kane ka jingjop, ka Bayern ka la ïoh ban lamkhmat na ka Group-C ha kaba ka la kamai 6 point na ki ar sien ïakhun. Boca Juniors kaba dangkamai tang 1 point, ka dangdon jingkyrmen ban ïoh rung, hynrei ka donkam ban jop ïa ka Auckland City ha ka sngi Ba-ar ka ban long ha Nashville bad ba ka Benfica kan shah rem ha ka Bayern ka ban long ha katei kajuh ka sngi ha Charlotte.
Ha ka jingïakhun jong ka Group-E kaba la long ha ka sngi Saitjaiñ, ka Inter Milan ka la wanphai ban pynliem noh ïa ka Urawa Red Diamonds da 2-1 kol na ka bynta ban pynkut noh ïa ka jingïaid lynti katei ka kynhun ïalehkai kaba na Japan ha ka Club World Cup.
U Ryoma Watanabe u la ïoh ban pynkhih jar nyngkong eh na ka bynta ka Urawa ha ka minit kaba 11 bad kane ka shi kol ka la ïai neh haduh kaba kut jong ka kylla step na ka daw ka jingbym lah ban pynphai da katei ka kynhun kaba na Italy.
Hynrei ka jingïakhun tyngeh ki rangïalehkai ka la pynlong ïa ka Inter ban pynphai kylla lyngba u Lautaro Martinez ha ka minit kaba 78 bad ïa ka kol kaba ar la thep da u Valentin Carboni uba la thep hashwa ban wai kata ha ka minit kaba 90+2 bad ban khur syndon ïa ka jingjop.
Lyngba kane ka jingjop, ka Inter ka la kamai 4 point ha katei ka group ha kaba ka la ïaryngkat bad ka River Plate, kaba la ïakhaid khlem don ba lah ban thep kol pyrshah ïa ka Monterrey ha Pasadena.
Haba phai sha ka jingïalehkai jong ka Group-F, ka Borussia Dortmund ka la jop da 4-3 kol pyrshah ïa ka Mamelodi Sundowns ha Cincinnati.
Ha kane ka jingïa-khun, ka Sundowns ka la pynkhih jar nyngkong lyngba u Lucas Ribeiro (11), hynrei ka Dortmund ka la lah ban pynïakhaid kylla lyngba u Felix Nmecha (16). Kane ka kynhun ka la pynbud biang sa ar kol hashwa ban kut ka jingïalehkai jong ka kylla step lyngba u Serhou Guirassy bad u Jobe Bellingham. Hadien san minit ba la bteng ïa ka jingïakhun jong ka kylla miet, ka Dortmund ka la ïoh biang sa shi kol lyngba ka jingbakla thep hi da u rangïalehkai ka liang pyrshah u Khuliso Mudau na ka bynta ban tam da 4-1 kol. Hashwa ban wai ka Sundowns ka la lah ban pynphai ar kol lyngba u Iqraam Rayners bad u Lebo Mothiba hashwa ba kan mad ïa ka jingshah rem.
Te kumta ka Dort-mund ka la kamai 4 point ryngkat ka Fluminense, kaba la jop da 2-1 kol ïa ka Ulsan ha New Jersey na ka bynta ban pynkut noh ïa ka jingïaid lynti katei ka kynhun kaba na Korea.
