Shillong, Jylliew 22
Ha ka jingtohkit jong ki pulit ka Special Inves-tigation Team (SIT) na Shillong kiba dang don ha Indore, la lap ba u briew uba thang ïa ka pla jong ka Sonam Raghuvanshi kaba la lap ha ka Sngi U Blei, u dei u nongap khyrdop ha ka jaka ba don ka ïing ba ka Sonam ka la shong wai ha Indore.
Katkum ki khubor la ong ba ki pulit ki la kem ïa u Balwinder ïa uba la tip ruh kum u Ballu. La kem ïa u na Ashok Nagar bad la leit rah sha Crime Branch Police Station jong ki pulit Madhya Pradesh ha Indore. Hadien kata la rah ïa u sha district hospital ha Indore ban phah peit bniah ha ki doktor.
Lah ban pynkynmaw ba ha ka Sngi U Blei, ki pulit na Shillong kiba don ha Indore ki la lap ïa ka pla ba la pyndonkam da ka Sonam hynrei la shem ba ïa kane ka pla la dep ban thang noh ha ka jaka ba la tip kum ka Hare Krishna Vihar Colony. La ong ruh ba ïa kane ka pla la rah na ka ïing sah wai jong ka Sonam da u trai ïing ïa uba la tip kum u Shilom James uba la shah kem ha ka miet jong ka Sngi Saitjaiñ.
