Shillong, Jylliew 22
U Myntri Rangbah ka Jylla, Conrad K Sangma u lah ban pynhiar shuki noh ïa ki saw ngut ki Myntri Sorkar lashem bnai (Naitung) 2025 bad ban pynrung bujli da kiwei pat ki MLA.
Kane ka jingthmu ban bujli Myntri ha ka Sorkar Meghalaya Democratic Alliance (MDA)-2 ka dei hadien ba la ïaid ka ar snem shiteng ka ban kut ha u Naitung 2025.
Katkum ki khubor kiba la ïoh lum la ïathuh napdeng 11 ngut ki Myntri Sorkar (lait noh u Myntri Rangbah ka Jylla) ki ban shah pynhiar shuki kin don saw ngut.
Kine saw ngut ki long u Bah Comingone Ymbon uba dei u Myntri ba dei peit ïa ka tnat Food Civil Supplies bad kum u MLA ka NPP na Raliang Konstitwensi, u Bah AL Hek uba bat ïa ka tnat Animal Husbandry & Veterinary uba dei u MLA ka BJP na Pynthorumkhrah Konstitwensi, u Bah Shakliar Warjri uba bat ïa ka tnat Ïalehkai bad kum MLA ka HSPDP na Mawthadraishan Konstitwensi bad u Rakkam A Sangma uba bat ïa ka tnat pule-puthi uba dei u MLA ka NPP na Rongara Siju.
Kum ban shu pynkynmaw ba ka BJP bad HSPDP kiba don ar ngut ki MLA ki la dep ïakren ban bat mar ar snem shiteng hynrei ha ka NPP kam don ka jingïapynbeit hynrei u Conrad K Sangma uba dei u Myntri Rangbah bad kum President ka NPP u lah ban pynhiar shuki na ki katto-katne ngut ki Myntri jong ka NPP ban thep bujli ïa kiwei ki MLA.
Ki khubor ki ïathuh ba na ka NPP kin weng Myntri ïa u Bah Comingone Ymbon bad ban pynrung bujli da u Bah Wailadmiki Shylla, MLA ba la jop arsien na Jowai Konstitwensi, West Jaiñtia Hills District bad yn weng ïa u Rakkam A Sangma ban pynrung bujli da u Marthon J Sangma, MLA na Mendipathar ha North Garo Hills District.
Katba ha ka BJP yn weng ïa u Bah AL Hek bad ban pynrung da u Bah Sanbor Shullai, MLA na South Shillong Konstitwensi.
Kumjuh, ha ka HSPDP yn weng ïa u Bah Shakliar Warjri bad yn pynrung bujli da u Bah Methodius Dkhar, MLA na Mawshynrut Konstitwensi ha West Khasi Hills District.
Hynrei haduh mynta ka UDP kaba don ar ngut ki Myntri ha ka Sorkar MDA-2 ym shym la ïoh jingtip eiei la kin ïa bujli ne kin bat beit kine ar ngut kata u Bah Paul Lyngdoh uba bat ïa ka tnat Jngohkai Pyrthei bad Bah Kyrmen Shylla uba bat ïa ka tnat Revenue & Disaster Management haduh ban da kut san snem.
