Shillong, Jylliew 22
U Marc Marquez u la ïoh jingjop ha ka Italian Grand Prix na ka bynta ban pynjlan ïa la ka jingjop ha ka kyrdan ba ha khlieh duh jong ki nongñiah MotoGP.
Une u nongñiah thuk thuk na Spain u la dep ban jop ha ka jingpynmareh kali ha ka sngi Saitjaiñ bad u la ïoh ïa ka kyrdan kaba 100 kaba la pynpra ïa ka rekod ban sdang ïa kane ka jingïamareh jong ka Sngi U Blei ha Mugello circuit.
Naduh ka kut jong kaba nyngkong eh u Marquez, hynmen jong u, u Alex bad uwei pat u nongñiah jong katei ka ri u Francesco Bagnaia ki la ïakylliang jaka ha ka jingsdang.
Da kaba u Bagnaia u la bud ïa ki arngut kiba hakhmat eh, u Marc Marquez u la lah ban ïoh biang ïa ka jingjop na u hynmen jong u ha ka wat (lap) kaba hynñiew.
Une u nongñiah jong ka Ducati ba 32 snem ka rta u la lamkhmat mynta ïa kane ka nam lahduh da 40 poiñ na u Alex Marquez hadien ba u la ïoh ïa ka jingjop kaba nyngkong ha Italy naduh u snem 2014.
“Ka dei ka jingsngew kaba phylla”, la ong u Marc Marquez. “Ngi don ha ka jaka pynmareh jong ki thuk thuk Ducati bad nga tip ba ka long kaba kyrpang bha na ka bynta jong ki kumta ka long kaba bha ban don lai tylli ki Ducati ha ka madan.”
“Naduh kaba sdang u Francesco bad u Alex ki la pyrshang katba lah ban khanflad ïa nga, hynrei nga la pynleit jingmut ha kane ka jingïakop bad nga sngewkmen ba nga la lah ban kynjoh sha ka thong jong ka jingjop.”
Kane ka jingïakob kan bteng biang ha kaba kut jong ka taïew ban wan da ka Dutch Grand Prix ha Assen.
