Shillong, Jylliew 22
U Wankyrmen L. Mawphlang bad ka Filinza Hansepi ki la long kum lahduh ha ka liang ki shynrang bad kynthei ha ka jingïakop mareh ba la tip kum ka 6th Shillong 10K Run 2025 ha ka sngi Saitjaiñ.
Ha kane ka jingïakop ba la pynïaid da ka Meghalaya State Olympic Association (MSOA) kaba long shi bynta ban rakhe ïa ka International Olympic Day kaba la thmu ban long ha ka 23 tarik kaba long shi bynta jong ka jingseng ïa ka International Olympic Committee ha u snem 1894.
Kane ka jingïakop mareh 10km la pynlong ha kylleng ka pyrthei bad ka Shillong kam shym la long kaba kyrpang, ha kaba da ki spah ngut ki nongmareh, naduh ki samla haduh ki tymmen, ki ïashim bynta shitrhem manla u snem da ka mynsiem ka jingsngewtynnad.
Hadien u Wankyrmen, ïa ka kyrdan ba-ar bad balai la khur da u Rangki Jonathan Pathaw bad u Rishanmehi Ryngkhlem ha ka liang ki shynrang. Katba ha ka liang ki kynthei, ka Filinza ka la khur ïa ka jingjop hadien ba ka la lah ban tam ïa ka Angelista Syiemlieh bad ka Inocensia Tympuiñ, kiba la wan ha ka kyrdan ba-ar bad balai.
Ha ka liang ka jingïakop mareh ba 50 snem shaneng ha ka liang ki shynrang, u Bah Arvind Basaiawmoit u la wan ha ka kyrdan ba nyngkong hadien u la tam ïa u Bah Lawrence Parïong bad u Dr Mario Danny Hek. Katba ha ka liang ki kynthei, ka Kong Mena Mary Wahlang, Julina Wanñiang bad ka Kong Smarless Marweiñ ki la wan ha ka kyrdan ba nyngkong, ba-ar bad balai.
I Kong Kmoiñ Wahlang, iba dei kawei na ki nongmareh ba paw jong ka Jylla, im shym la shim bynta mynta u snem. Hynrei i la shah khot ha ka MSOA na ka bynta ban kaweh ïa ka lama kum ka kongsan. Te kumta i la ai ïa ki kyntien ai mynsiem hashwa ban sdang ka jingïakop bad I la ai khublei ïa ki nongpynïaid bad ai mynsiem ïa ki nongmareh kiba don ïa ka jingthmu ban wanrah burom ïa ka Jylla bad ka ri hi baroh kawei.
Kiwei kiba la ïadon lang ki long u Assistant Director ka tnat ïalehkai Bah Païa B War Nongbri, kumjuh u General Secretary ka MSOA Bah Finely Lad Pariat lem bad kiwei ki heh nongïalam ka MSOA.
Ka lynti ïamareh ka la sdang na parking lot Polo hashwa ban ïaid sha Saw Furlong, BK Bajoria School, PGT College, Shillong Commerce College, Shillong College, Don Bosco Square, Laitumkhrah Police Point, Laitumkhrah Police Beat House, Fire Brigade, St Edmund’s School, Dhankheti, Malki Point, Barik Point, Civil Hospital, State Central Library, Meghalaya Secre-tariat, Deputy Commissioner’s Office, Governor’s House, Ward’s Lake, jaka sah u Myntri Rangbah, ïew Polo hashwa ban pynkut biang ha madan Polo.
La sam da ki song pisa sha baroh ki nongjop kiba la wan ha ka kyrdan ba nyngkong, ba-ar bad balai kaba long T. 5,000, T. 3,000 bad T.2,000.
