Shillong, Jylliew 22
Ka Sorkar Jylla ka la plie paidbah ïa ka ‘Season 3’ jong ka Meghalaya Grassroots Music Project (MGMP) ha ka janmiet Sngi Saitjaiñ, kaba dei ruh ka sngi rakhe ïa ka ‘World Music Day’, kaba mynta la pynbeit thymmai bad pynkylla kyrteng sha ka Chief Minister’s Grassroots Music Program (CMGMP).
Ïa kane ka jingïalang kaba la pynlong ha Lariti Main Auditorium, Shillong, la donlang u Myntri Rangbah ka Jylla, u Conrad K. Sangma kum u Kongsan bad u Myntri ka tnad kam jngoh kai pyrthei, Bah Paul Lyngdoh kum u Symbud Kongsan, ha ka jingdon lang ki ‘riewdon sap ha ka liang ka put ka tem, ki heh ophisar, ki nongshim bynta, bad ki paidbah ‘riew ieid jingrwai.
Ha ka jingkren jong u, u Myntri Rangbah u la ïasam ïa ki jingpyrkhat shimet ba jylliew jong u naduh ka jinglong samla haba u dang pyrshang ban long kum u nongtem. U la kren shai shaphang ki jingeh ba ki nongtem ki ïakynduh kumba ar ne lai phew snem mynshuwa-naduh ka jingpynlong ïa la ki jong ki ‘Concert’ haduh ka jingïakhun ban ïoh ka jingithuh bad ban ïoh ïa ki tiar tem.
Kine, u la ong, ki la pynwandur ïa ka jingthmu ka Sorkar ban pyntikna ba ka pateng ban wan jong ki nongrwai bad nongput-nongtem kan ym donkam shuh ban ïaid ha kata ka lynti kaba marwei.
“Ngi kwah ban ai ïa ki samla jong ngi ïa ka jingkmen ban sei madan la ki sap ha rynsan, ka jingithuh kaba ki dei hok ban ïoh, bad ka rynsan ban bud ïa ka jingsngewtynnad jong ki,” u la ong.
U Myntri Rangbah u la batai kumno ka jingthmu ka MGMP, kaba la sdang tang da kaba rit, da T.3.5 klur bad 2,500 ngut ki ‘riewdon sap ha ka snem banyngkong, ka la kiew sha ka prokram kaba T.69 klur, kaba kyrshan ïa palat 5,400 ngut ki ‘riewdon sap bad palat 38,000 tylli ki rynsan pyni sap ha kylleng ka Jylla.
U la pynbna ba ka MGMP, kaba la pynkylla kyrteng mynta sha ka CMGMP, kan ym sah shuh kum ka projek kaba shi por, hynrei kan kiew sha ka prokram Sorkar ka ban neh, kaba la buh ryntih, bad kaba man u snem.
Da kaba rah shakhmat ïa kane ka jingthmu, u la ban jur halor ka jingdonkam ban kyrshan ïa ki ‘riewdon sap ym tang lyngba ki jingrwai ba ki rwai ha ki rynsan hynrei ban tei ïa ka karkhana jong ka put ka tem kaba neh. U la tyrwa ïa ki lad ki lynti bathymmai ban pynbiang ïa ki ‘Recording Studio’, ki tiar kiba bha, bad ki tiar tem sha ki nongtem, khamtam kito kiba donkam jingïarap.
Ka Sorkar ka thmu ruh ban wanrah ïa ki rynsan ïakop tem bad ki jingkyrshan ba la buh ryntih na bynta ka jingpynmih jingrwai bad ka jingpynroi ha ka liang ki bor teknoliji.
“Kane ka prokram mynta ka dei ban ïaid shakhmat ym tang ban shu ailad ban pynlong ïa ki rynsan ïatem-ka dei ban thaw ïa ki jingrwai lajong, ban pynneh pynsah ïa ki sur tynrai jong ngi, bad ban rah ïa ka sap jong ka Meghalaya sha ka rynsan jong ka ri bad ka pyrthei,” u la pynbna.
U la khot la wer ruh ïa ki nongtem trai-ri ban wad ïa ki tynrai jong ka pateng jong ki kumjuh ban wad ki lad ki lynti ban pynïasoh lang sha ki jingrwai ka juk mynta.
“Ka jinglong kyrpang jong ngi ka don ha ka jingrwai bad ka put ka tem jong ngi, bad ka kolshor jong ngi ka dei ban ïoh jaka ha ka rynsan jong ka pyrthei”, u la ong.
Na ka liang u Myntri Rangbah, u la pyllait ruh ïa 2 tylli ki kot ha katei ka jingïalang-‘CMGMP Rock and Tourism Festival Booklet’ bad ka ‘Council Technology Booklet’.
U la pynbna ruh ba tang ha une u snem ba la dep, ka Jylla ka la pynlong ïa 7 tylli ki ‘Concert’ kiba heh ha ki 13 sngi ha kaba 3.86 lak ngut ki la wan ban ïashim bynta – kaba la pynmih T.133.42 klur, ka jingmih ha ka liang ka ïoh ka kot na ka T.23.5 klur ka jingbei tyngka paidbah-ka jingmih na ka jingbei tyngka kaba 5.6x.
Kine ki prokram ki la thaw ruh palat 5,500 tylli ki kam ha ka shi sngi bad khring ïa ki nongjngohkai pyrthei na palat 20 tylli ki Jylla ka ri.
U Myntri ka tnad kam jngoh kai pyrthei, Bah Paul Lyngdoh, ha ka jingkren jong u, u la batai ba ka put ka tem ka dei kaba la ngam jylliew ha ka mynsiem jong ka Jylla.
Da kaba shim na ka ‘The Sound of Music’, u la ong, “Ki lum ki im ryngkat ka jingsawa jong ka jingrwai,” da kaba khring ïa ka jingnang kiew jong ka CMGMP wat ha ki shnong ba jngai. U la ïaroh ruh ïa ka jingkylla jong ka put ka tem na ka jingsngewtynnad sha ka lad kamai bad kyntu ïa baroh ki ‘riewdon sap kiba don ka jingangnud ban pynrung kyrteng ha ka CMGMP.
Ha kane ka sngi, ka la don ruh ka jingsam khusnam jong ka MGMP ban pynkup burom ïa ki ‘riewdon sap na Ri-lum Khasi, Jaiñtia, bad Garo bad ka ‘Live Performance’ ba kyrpang na u Anuv Jain.
