Ka tem ka put ka rwai ka siaw ka don ïa ka bor ban pynkoit bad pynïatylli: DC

Jowai, Jylliew 22

Ïa ka ‘World Music Day’ ne ka sngi ka tem ka put ha ka pyrthei la rakhe ha ka 21 tarik Jylliew ha ka prokram ba la khot pynlong da ka ophis u Deputy Commissioner (DC) ka West Jaiñtia Hills District hapoh District Library Auditorium, Mynthong, Jowai.

Ha kane ka jingrakhe la wan ïashim bynta da ki kynhun nongtem nongrwai na kylleng ka district, kiba kynthup ïa ka kynhun ELEVB Choir, Magnificent obsession Jowai, Reggae Collective, Larger than 90, TSEVA Eniba War, Horealda Pasweth, Effie VanroiRyngkhlem, KER E bad ka lahduh ha ka jingïakop rwai inter school.

Haba ai khublei ïa baroh ha kane ka sngi ba kyrpang, u Deputy Commissioner Abhinav Kumar Singh, IAS u la ong, kane ka sngi kam dei tang ka put ka tem hynrei ka dei ka jingïakynduh lang kum ki nongshong shnong hapoh ka imlang ka sahlang. U la ban jur ruh ba ha baroh ki pateng, ki kynhun bynriew bad ki riew shemphang ki ïatylli lang kawei ban rakhe ïa kawei ka sur kaba pynïasoh lut ïa baroh.

U la ban jur ruh ba ka tem ka put, ka rwai ka siaw ka don ïa ka bor ban pynkoit, ban ai mynsiem bad ban pynïatylli. U la ong ba ka tem ka put ka ïathuh ïa ki khana haba ki kyntien ki duna, ka rah ïa ngi ha ka khyllipmat jong ka jingkmen bad ka pyntngen ïa ngi ha ka por jong ka jingsngewsih.

Haba kdew halor ka jingriewspah ha ka liang ka deiriti jong ka district, u la kdew ba ka tem ka put hapoh ka district kam dei satia tang ka jingpynbyrngia hynrei ka pynpaw ïa ka jinglong kyrpang bad ki riti dustur.

Ha kajuh ka por u DC u la ai khublei kyrpang ïa baroh ki kynhun kiba la wan ïashim bynta ha kane ka jingrakhe.