Shillong, Jylliew 22
Ka Kong Balamon Sohtun kaba dei ka kmie jong u Donald Sohtun kaba shong bad sah ha Mawpynthih, Mylliem ka la ïathuh ba u Donald u la wan sah sha ïing ha Mawpynthih tang shi miet ha shwa ba un leit aiti sha ki pulit ha ka 30 tarik Jymmang 2025 hadien ba la lap ïa ka metïap jong ka Kong Priya Khongstia kaba la shah pynïap ha ïingsah wai ha Nongrah Nonglum Brei.
Ban tip kham bniah, u nonglum khubor U Nongsaiñ Hima u la leit sha Mawpynthih ban ïakynduh ïa ka kmie u Bah Donald bad ïa u Rangbah Shnong Mawpynthih.
Ka Kong Balamon ka la ïathuh hadien ba la ïoh jingtip ïa kane ka kam runar, haba ka la kylli um shym la jubab eiei hynrei ha ka 30 tarik Jymmang u la leit aiti noh sha ki pulit.
Ka la ïathuh ba u Donald u dei uba bun lok bad don khun ruh hynrei ïa kane ka Priya u la wan pynithuh kumba shi bnai eiei shwa ba un leit sah sha Nongrah.
Ka Kong Balamon ka la ïathuh ruh ha ka Priya ba u Donald u dei uba bun lok hynrei ma ka ruh ka la tip ïa kata, kumta ka la sngap noh.
Haba ïoh ban ïakren bad u Bah Kliensing Kharmawphlang uba dei Rangbah Shnong Mawpynthih, Mylliem u la ïathuh ba u Donald Sohtun u la ong hakhmat ka kmie ba “Kumno ngan ïathuh haba ka long kaba shisha.”
Kane ka jingïathuh u Bah Kliensing ïa ka jingphla u Donald Sohtun ka dei ha ka jingïakren bad u ha shnong Mawpynthih ha ka 21 tarik Jylliew 2025.
U la ïathuh ba ka jingpynpaw u Donald ïa kitei ki kyntien “Kumno ngan ïathuh haba ka dei ka jingshisha” ka dei hadien ba ka kmie jong u ka la banjur ban kylli haba ka la ïoh jingtip ba u la shah kynnoh ba u la pynïap ïa la ka kurim ka Priya Khongstia kaba la lap ïa ka met ha ka 30 tarik Jymmang, 2025 ha ïingsah wai ha Nongrah Shillong.
U Bah Kliensing u la ïathuh haba u la shah phone ha u trai ïing na Nongrah u la leit mih sha ïingsah ka kmie u Donald ha Mawpynthih bad haba la kylli u la shu pynpaw tang ïa kine ki kyntien bad u sngap noh.
Kumta u la bthah ïa u ban leit mih noh sha thanat bad ha kajuh ka sngi u la leit sha thanat Rynjah.
Ha kajuh ka por u la ïathuh ba une u Donald um dei u trai shnong na Mawpynthih hynrei u shu wan sah haba don ka kmie.
