Shillong, Jylliew 22
Kawei ka khynnah kaba dang 16 snem ka rta ryngkat bad kiwei ar ngut ki shynrang kiba donkti ha ka kam tuh, ki la shah kem noh ha ki pulit ka thanat Mawlai ha ka Sngi U Blei.
Ki pulit ki la kem ïa lai ngut ki samla ba kynthup ïa kawei ka khynnah kynthei, kiba donkti ha ka ban pajut jubor ïa ka jingdeng sohshkor na ki khynnah skul kynthei ha ka thaiñ Mawlai.
Ha ka kyrwoh khubor, u Superintendent of Police ka East Khasi Hills, Bah Vivek Syiem, u la pyntip ba kine lai ngut ki runar ki kynthup ïa ka khynnah kynthei kaba dang 16 snem ka rta, u Mabanker Jyrwa (23 snem) ba shong ba sah ha Jaïaw Lansonalane bad u Charles Myrthong (20 snem) ba sah ha Riatsamthiah.
Da kane ka jingïoh kem, kane ka khynnah kynthei ka la leit ïalam lynti ïa ki pulit sha ka dukan die ksiar kaba la tip kum ka New Oscar Jewellers Shop kaba don ha Mawbah, bad ïoh ban kurup ïa baroh ki jingdeng ksiar.
Katkum ka jingïathuh jong u SP, ki pulit ka Mawlai ki la ïohpdiang ïa ka ejahar ha ka 18 tarik Jylliew na ka Kong Elinda Marbaniang ba sah ha Mawlai Nongkwar, kaba pyntip ba ha kane ka janmiet hapdeng ka por 1:30 haduh 2 baje, katba ka khun ba dang 9 snem, ka dang wan na skul, kawei ka kynthei ka la buddien ïa ka naduh ka lynti ïaid kjat na Wahumkhrah.
Ka la ïathuh ba kane ka briew ka la leh mynleh ban kylli shaphang uwei pat u khynnah ba kyrteng u Adrian, uba pule ha ka klas III, ïa kaba ka khun k ala jubab ba kam tip eiei.
U la ïathuh ba kane ka kynthei ka la buddien ïa ine i khynnah haduh ha Mawlai Nongkwar Block-2 bad ka la ktah ïa ki shkor ine khynnah bad hadien ka la pajut jubor ïa ki sohshkor ha shuwa ban phet krad na kane ka jaka.
Ki Pulit ka Mawlai ki la register ïa kane ka case hapoh ka Mawlai PS Case No 61(6)2025 bad pynngat hapoh ka kyndon 304(2)/115(2)/351(2) BNS.
U Bah Vivek u ïathuh ba ha ka 20 tarik Jylliew ruh, ki pulit ki la ïohpdiang ïa ka ejahar na ka Kong Sumardiam Kharlukhi na Mawlai Nonglum, kaba pyntip ba ha kane ka janmiet por 4 baje-4:30 baje eiei, lai ngut ki briew bym lah ban ithuh kynthup ïa kawei ka kynthei bad ar ngut ki shynrang, ki la wan rung sha ka ïing jong ka, katba ka khun kynthei ba dang 9 snem, ka dang ïalehkai habar.
U la ïathuh ba ha kane ka jingjia ruh, kane ka kynthei ka la ot jubor ïa ka jingdeng sohshkor bad phet bak na kane ka jaka.
Ïa kane ka jingjia ruh la register case ha thanat Mawlai katkum ka Mawlai PS Case No 62(6)2025 bad la pynngat ïa ki hapoh ka kyndon 304(2)/3(5) BNS. Ka jingtohkit ïa kine ki lai ngut ki runar ka la ïaid shakhmat.
