Jowai, Jylliew 22
Hadien ka jingbymlah jong ki bor district ban pynsangeh ïa ka jingkyntur pud jong ki Karbi na Assam sha u pud u sam jong ka shnong Lapa-ngap hapoh West Jaiñtia Hills District, ka Dorbar Shnong Lapangap ka la shim ïa ka rai ban dawa ïa u Myntri Rangbah jong ka Meghalaya ban pynsangeh noh mardor ïa katei ka jingkyntur pud jong ki Karbi.
Ki nongshong shnong Karbi na West Karbi Anglong District ki la leit lur ïa ka lum pynthor da ki kor puh shi lum ne ki JCB ha ka jaka kaba dang hap hapoh u pud u sam jong ka shnong Lapangap.
Haba pyntip halor kane, u Waheh Shnong jong ka shnong Lapangap, Bah Deimon-mi Lyngdoh u la ïathuh ba ka Dorbar Shnong Lapangap ka la rai ruh ban leit tur hi dalade bad ki nongshong shnong jong ka ban ïada ïa la u pud u sam jong ka shnong na ka jingkyntur pud ki nongshong shnong Karbi na Assam hapoh kine ki khyndiat sngi lada u Myntri Rangbah um lah ban pynsangeh ïa katei ka jingkyntur pud.
Lah ban kdew ba ki bor jong ar tylli district; ka West Jaiñtia Hills District bad ka West Karbi Anglong District ki la ïakynduh ha ka 20 tarik mynta u bnai ha Khanduli ban ïakren halor katei ka jingkyntur pud jong ki Karbi sha ka shnong Lapangap.
Hynrei ha ka 21 tarik mynta u bnai u waheh shnong u la ïathuh ba ki nongshong shnong ka Karbi ki la wan da u shnong ban thung dieng ha katei ka jaka kaba ki la dep lur.
Na ka liang jong u Waheh Shnong jong ka Lapangap u la pynpaw ïa ka jingsngewnguh ïa u DC, u SP jong ka West Jaiñtia Hills District bad kiwei de ki heh ka district halor ka jingshimkhia jong ki, hynrei kumba paw mynta ka bor district kam lah satia ban pynsangeh ïa katei ka jingkyntur pud bad kumta ka donkam ka jingtuklar jong u Myntri Rangbah jong ka Jylla, la ong u Bah Deimonmi.
