Shillong, Jylliew 22
Ka tnad pule-puthi ka Sorkar Jylla ka la pyntip ba la dep ban pyllait ïa 20% na ka pisa (baroh) hapoh ka ‘Umbrella Scholarship’ na bynta ki samla pule ST kum ka sien siew (Instalment) banyngkong sha baroh ki nongïoh jingmyntoi kiba dei hok ban ïoh.
Katba ïa ka pisa kaba sah yn sa pyllait ha ki 2-3 sien siew (instalment) katkum ka por ba la buh ban pyllait ïa ka pisa na ka Sorkar India.
Ïa kane la pynbna lyngba ka kyrwoh u Commissioner & Secretary ka tnad pule-puthi ka Sorkar Jylla.
Ka kyrwoh ka ïathuh ruh ba ha ki snem ba la dep, ka Sorkar India ka ju pyllait ïa ka baibam ‘Post-Matric Scholarship’ ha ki 3-4 tylli ki sien siew, ha kaba kawei-pa-kawei ka sien siew ka kynthup tang ïa shi bynta jong ki samla pule.
“Kumta bun ki samla pule ki hap ban ap khmih lynti ha ryngkat ka jingkhuslai na bynta ka bhah baibam jong ki. Hynrei sdang mynta u snem, ka tnad pule-puthi ka la shim ïa ka rukom treikam kaba thymmai ban pyntikna ba man la iwei-pa-uwei samla pule kiba dei hok, kin ïoh pdiang ïa ka pisa ha man la ka sien siew,” ong ka kyrwoh.
Ha kajuh ka por, ka kyrwoh na une u heh ophisar ka pynshai ba ym dei ban ïakhleh lang ïa kane ka baibam bad ka Chief Minister’s Scholarship Scheme, ïa kaba la pynbna ha ka Dorbar Mang Tyngka ba la dep, naba ka jingpynrung kyrteng na ka bynta kane ka skhim kan sdang hadien ba pynmih ïa ka jingpynbna paidbah ïa ka skhim bad ki jingbthah ba bniah jong ka.
Kum ban shu kdew hangne, ha ka 20 tarik Jylliew, 2025, ka tnad pule-puthi ka la sdang ban pyllait ïa ka sien siew banyngkong (20%) jong ka ‘Post-Matric Scholarship’ sha ki samla pule ST na ka bynta ka samoi pule 2024-25, kaba ai jingmyntoi ïa 66,000 ngut ki samla pule kiba ki ‘bank account’ jong ki, la dep pynïasoh bad u ‘Adhaaar’.
Na ka bynta ki 7,902 ngut ki nongïoh jingmyntoi kiba dang sah, ki bym pat ïoh ïa ka baibam jong ki, la phah ïa ka jingpynbna ‘SMS’ ha ka 20 tarik u Jylliew, 2025 na ka National Scholarship Portal (NSP) sha ki ‘mobile number’ (ba la pynrung kyrteng da ki samla pule), da kaba ai jingmut ïa ki ban pynshisha bad pynthymmai ïa ka jingpynïasoh ‘Aadhaar’ bad ki jaka kynshew pisa jong ki.
Hadien ba la ïohpdiang ïa ka ‘SMS’, la ai por 15 sngi ïa ki nongïoh jingmyntoi ban pyndep ïa ka jingdonkam ba ïadei bad ka jingpynïasoh ‘Aadhaar’ bad hadien kane ka jingai por, ïa ki bui jingsiew jong kito kiba la seisoh ban pynthymmai ïa ka jingpynïasoh ‘Aadhaar’, yn sa pyntreikam lyngba ka ‘NSP Payment Module’.
Shuh shuh ka kyrwoh ka pynkynmaw ba ka rukom treikam jong ka NSP kam shah ban sdang ha ka ban siew ha shuwa ban kut jong ka jingai por ba 15 sngi hadien ka jingpynbna ‘SMS’.
“Na bynta kino-kino ki jingkylli ne jingeh, sngewbha thoh sha [email protected]. lane ban ‘phone’ ha ki nombor – 7005037347/ 9077574956,” pynkut ka kyrwoh.
