Shillong, Jylliew 22
Ka Meghalaya Boxing Association (MBA) ka la sei 12 ngut ki nongïakura ban mihkhmat ïa ka Jylla sha ka 6th U-17 Boys & Girls National Boxing Championships kaba la long ha Rohtak, Haryana naduh 19 haduh 25 tarik mynta u bnai.
Ha ka liang ki shynrang ki kynthep ïa u Kyrshan Swer na East Khasi Hills ha ka kyrdan ïalehkai 44-46kg, kumjuh u Karan Sunar na Ribhoi ha ka 46-48kg, Banrap Syiem na East Khasi Hills ha ka 48-50kg, Chingkam M. Marak na West Garo Hills ha ka 50-52kg, Erickson Kahit na East Khasi Hills ha 52-54kg, Bitdor L. Mawnal na Eastern West ha ka 54-57kg, Mangara Nongtdu na East Khasi Hills ha ka 57-60kg, Disrang D. Sangma na East Garo Hills ha ka 60-63kg, Mark Akimbo D. Marak na East Garo Hills ha ka 63-65kg bad u Casbe K. Marak na West Garo Hills ha ka 66-70kg. Katba ha ka liang ki kynthei ki long ka Erkyrpang Sohïong na Ribhoi ha ka 44-46kg bad ka Evanjalyne Sohbar na Ribhoi ha ka 46-48kg.
Kat kum ka kyrwoh ba la pyllait da katei ka synjuk, la ong ba ka Ekyrpangmeka Sohïong ka la pynliem noh ïa ka Ayushaben Chaudhari (Gujarat) ha ka preliminary round jong ka kyrdan ïalehkai 44-46kg bad u Banrap Syiem u la jop ïa u Kulungoi (Nagaland) ha ka 48-50kg. Te kumta kine ki jingïakhun ki dangïaid shakhmat bad la khmih lynti ba kin lah ban pynurlong ïa ka jingjop bad ban wanrah burom na ka bynta ka Jylla hi baroh kawei.
