Shillong, Jylliew 22
Ka Khasi Author Society (KAS) ha ka Sngi Saitjaiñ ka 21 tarik u Jylliew 2025 shi bynta ban rakhe kynmaw burom lypa ïa ka jingdap 184 snem ka jingwan u Thomas Jones sha Ri-lum Khasi kaba dei ban long ha ka 22 tarik u Jylliew 2025, ka la pynlong ïa ka lympung ïamir jingmut ha ka jingïatreilang bad ka Tnat Khasi ka St. Edmund’s College, Shillong halor u synñiang jong u Thomas Jones sha ka jaitbynriew Khasi ba la pynlong ha St. Edmund’s College.
La wan ban plie ïa kane ka jingïamir jingmut da u Bah F.R. Kharkongor, IAS, Principal Secretary Arts and Culture ka Sorkar Jylla kum u kongsan bad pyllait paidbah ruh ïa ar tylli ki kot kiba thoh da ki dkhot jong ka KAS.
Nalor ki dkhot bad ki nongkitkam ka KAS la ïadonlang ruh ki bor ba dei khmih jong kaTnat Khasi katei kolej.
Ban pynshongkun shuh shuh ïa ka jingïalang plie ha katei ka sngi la ïoh da ka jingrwai na ka Music Club ka kolej bad kiwei-kiwei de.
Hadien kane la don ruh ar tylli ki sien shong ban ïamir jingmut ha kaba la ïoh ïa ka jingkren ha ka bynta ba nyngkong da ki ‘riew shemphang kynthup ïa u Rev. A.I. Kharshiïng bad u Father Dr. Barnes Mawrie.
Ha ka sien shong ïamir jingmut ba ar, u Dr. D.R.L. Nonglait kum President ka Khasi Authors Society (KAS) u la kren halor ka phang u Thomas Jones u paralok ki Khasi pyrshah ïa ki phareng ha kaba u la ong ba ki Missionary na ri Wales kim sngewthuh ïa ka buit treikam jong u.
U la pynpaw ba u Thomas Jones uba la wanrah ïa ki dak thoh Khasi u la wan ym tang kum u nongïalap hynrei u wan ruh ban shakri ïa ka imlang ka sahlang.
U la ong ba kane ka long kaba phylla ka jingshakri jong u Thomas Jones hapdeng kiba bun ki jingeh, u Thomas Jones u la lah ban pynïaid ïa ki kam kiba u la sdang wat haba u ïakynduh ïa ki jingeh, ki jingtynjuh, ka jingduh noh ïa i lok jong u bad ki khun ba dang shu kha.
“Kaba phylla ka long ba hapdeng kata ka jingpyrshah, ba wat kito kiba pyrshah ïa u ruh, ki btin ïa kane ka Mission lane ka jingshakri jong u. Dei na kata ka daw ba ka jingwan jong u Thomas Jones shane ka pynlong ïa ka jaitbynriew Khasi ban neh ban sah haduh kine ki sngi,” la ong u Dr. D.R.L. Nonglait.
Na ka liang u Bah F.R. Kharkongor, IAS, Principal Secretary Arts and Culture ka Sorkar Jylla haba kren ha katei ka sngi, u la ong ba ka jingwan jong u Thomas Jones ka la long kum ka jingpruid lynti na ka bynta ka jaitbynriew jong ngi, bad ka lah long ruh kawei na ki bynta kum ka jingai shabi ksiar, kaba ai ïa ngi ïa ka jingshai ha kajuh ka por kaba la pynplie lad plie lynti bad ban pynsaphriang ïa ka ktien ka thylliej, ka kolshor kaba riewspah.
U la ong ba ka ktien Khasi mynta ka la nangroi, ki kot pule ruh ki la nangroi lyngba ki ‘riew shemphang naduh mynshwa kiba la pynmih ïa ki kot Khasi.
Kum ban shu kdew hangne, ka 22 tarik Jylliew 2025 ka dei ka lyngkhuh sngi wan poi jong u Thomas Jones sha Ri lum Khasi. Dei une u radbah uba la pynïoh ïa ki dak thoh Khasi bad la ainam ruh kum u kpa ka thoh ka tar Khasi, namar ka jinglah jong u ban shem ïa ki dak thoh Khasi.
