Shillong, Jylliew 22
Ki pulit ka Special Investigation Team (SIT) na Shillong kaba tohkit ïa ka jingshah pynïap jong u Raja Raghuvanshi, ka la kem noh sa ïa uwei pat u briew na Indore halor ka jingkynnoh ba u la donkti ban weng noh ïa ka pisa kaba don 5 lak tyngka, pistol, ki jaiñ ki nep bad ka ksiar ka ksah na ka ïing sah ba la pyndonkam da ka Sonam Raghuvanshi bad u Raj Kushwaha ha Indore hadien ba u Raja u la shah pynïap.
Katkum ki khubor la ong ba utei uba shah kem u dei ba la tip kyrteng kum u Shilom James uba don bynta ha ki kam jaka puta bad ki ïing ki sem ha Indore. La ong ba la kem ïa u ha ka miet Sngi Saitjaiñ na ka dong Mahalaxmi Nagar.
Nalor kane, la ong sa uwei pat u briew uba trei kum u security guard ïa uba la kynnoh ba u la ïarap ïa ka Sonam ban weng ïa ki tiar ki tar na ka ïing ba ka sah shipor ha Indore u la shah kem lang.
Ki pulit ka SIT Shillong mynta la san sngi ki la pynlong jingtohkit ha Indore da kaba pynleit jingmut ha katei ka ïing ba ka Sonam ka la sah shipor ha Indore.
Kham mynshwa u James u la ïathuh ha ki lad pathai khubor ba u ithuh dur khmat jong uwei na kiba la shah kem kata u Vishal hadien ba ka dur ka dar jong u ka la paw ha ki lad pathai khubor. Hynrei na ki dur ki dar ba la ring na ka CCTV la shem ba utei u James u la rah ïa kawei ka pla na ka ïing ba la sah ka Sonam bad ban thep ha ka kali la jong bad kane ka la jia ha ka 10 tarik Jylliew.
Shuh shuh ki khubor ki ïathuh ba ïa kata ka ïing ba la pyndonkam ban sah ka Sonam la shim wai da u Vishal ha ka dor 17,000 shi bnai. Ka Sonam ka la leit sah ha kane ka ïing hadien ba ka la phet na Shillong.
La ngeit ba ka Sonam ka la mih na Indore ban leit sha Ghazipur ha Uttar Pradesh ha ka 8 tarik Jylliew ba ka la iehnoh ïa kata ka pla ha kamra.
Nalor kata la ong ba ar sngi hadien ka 8 tarik Jylliew, u James u la leit rung ha katei ka ïing ba la sah ka Sonam da kaba pyndonkam da uwei pat u shabi bad u la shim noh ïa ki pla, jaiñ, marbam bad kiwei.
