Pyongyang, Jylliew:
Katkum ki khubor, la ong ba ka North Korea ka la thmu ban phah biang sa 6,000 ngut ki shipai kynthup ïa ki Combat Engineer bad ki shipai rit ban ïarap pynkhlaiñ ia ka jingpahara ha ka nongbah Kursk jong ka Russia.
Ia kane la pynbna ha ka por ba u Secretary jong ka Russia Security Council- u Sergei Shoigu u don ha North Korea, ha ka jingiakynduh kaba arsien jong u bad u nongialam ka North Korea u Kim Jong Un hapoh mynta u bnai, kaba pynpaw ia ka jingjylliew jong ka jing-iadei hapdeng kine ki ar tylli ki ri.
U Chairman jong ka State Affairs jong ka DPRK, u Kim Jong Un, u la rai ban phah biang sa 1,000 ngut ki shipai sha Russia na ka bynta ban leit pynkhuid ia ki jaka ba la twa ha ka jing-iather bom bad ka Ukraine ha ki por ba la leit bad yn phah ruh ia ki 5,000 ngut ki shipai na ka bynta ban pynbha bad ban tei biang ia ki shlem treikam ba la dep shah pynjot ha ki bom bad ki ‘namding jong ka Ukraine.
Kat kum ka jingong u Shoigu, ka Russia bad ka North Korea ki thmu ruh ban thaw ïa ki jaka pynsah kynmaw na ka bynta ki shipai Korea kiba la ïap ha ka por ba ki dang ïakhun na ka bynta ka jingiada jong ka nongbah Kursk.
Da ka jingïarap jong ki shipai jong ka North Korea, la ong ba ki shipai jong ka Russia ki la ïoh biang ïa jan baroh ki bynta kiba ka Russia ka la jan shah kurup biang ha ki shipai ka Ukraine haduh u Lber 2025 da kaba pynkhyllem bad pynher krad ruh ïa ki shipai Ukraine na katei ka thaiñ haduh kaba kut jong ka aiom Tlang.
Ha ka 15 tarik u Jylliew, ka tnat iada ri jong ka UK, ka la ong ha ka jingpynbna jong ki nongsyntiat la antad palat 6,000 ngut ki shipai jong ka North Korea, ki la iap ne mynsaw hapdeng ka jing-iakhun bad ki shipai ka Ukraine hapoh ka nongbah Kursk.
