Khliehriat, Jylliew 23
Ka lympung ïalehkai Third Division League ba la pynïaid da ka East Jaiñtia Hills District Football Association (EJHDFA) kan sdang naduh 30 tarik mynta u bnai ha madan Artificial Turf kaba don ha Diengshynrum, Khliehriat.
U Tournament Secretary ka EJHDFA, Bah Embhah Lamurong, u la pyntip ba ha kane ka aïom kaba mynta ki don 38 tylli ki kynhun ki ban ïashim bad la phiah sha 16 tylli ki pool. Ki kynhun ban long nongjop ha kawei- pa-kawei ka pool kin ïoh rung sha ka pre-quarter final.
Ha katei ka sngi sdang ka jingïakhun kan long hapdeng ka Teilang SCSC Lummyrli pyrshah ïa ka Narwan SCSC ha ka por 11 baje mynstep, kumjuh ka Mookhep SCSC ïa ka Youngstar SSC Huroi por 1 baje mynsngi, katba ka Tongseng Youth SYSC pyrshah ïa ka Umlong SCSC ha ka por 3 baje nohphai sngi.
