Shillong, Jylliew 23
Ka lympung ïalehkai 4th Division Under- 20 Football League 2025 ba la pynïaid da ka Shillong Sports Association (SSA) ka la nangjam shaphrang ha kaba ka Mawphlang SC, Mawlyngngad SC bad ka Laitlulong SC ki la ïoh jingjop ha ka Lah Sngi U Blei.
Ha kane ka jingïakhun kaba la long ha SSA Stadium kaba ha First Ground, Polo, ka Mawphlang ka la pynliem noh ïa ka Mawpdang SC da 2-0 kol. Kane ka nam jop ka la wan urlong lyngba ki kol ba la thep da u Sundarsing K. Syiemïong ha ka minit kaba 4 bad kawei pat na u Arkindonlang Hujon (75).
Kumjuh ha ka jingïakhun kaba ar, ka Mawlyngngad SC ka la jop da 3-0 ïa ka Pynthorbah SC. U Bamar Kharsahnoh u la thep ar kol ha ka minit kaba 40 & 51 bad ïa kawei pat da u Batmiki Kharkongor (67).
Haba phai sha kawei pat ka jingïakhun kaba khatduh, ka Laitlulong SC ka la pynliem noh ïa ka Umsohsun SC da 2-0 kol. U Raplang Snaitang u la pynkhih jar nyngkong ha ka minit kaba 49 bad kawei pat la thep da u Bankerlang K. Dewsaw ha ka minit kaba 80 na ka bynta ban jop shisyndon.
Ka jingïalehkai ha ka Sngi Ba-ar kan long hapdeng ka New Challenger pyrshah ïa ka Ïateilang SC ha ka por 10:30 mynstep, kumjuh ka Mawnianglah SC ïa ka Laitumkhrah SC por 1:30 mynsngi bad ka Mawlynrei SC ïa ka Raitsamthiah SC ha ka por 4 baje nohphai sngi.
