Shillong, Jylliew 23
Ka Manchester City ka la pynjem khnap ïa ka Al Ain haduh shiteng dorjon (6-0 kol) ha ka Sngi U Blei na ka bynta ban ïoh jaka sha ka pre-quarter final ha ka Club World Cup, katba ka Real Madrid ka la ïohpdiang da ka red card ha kaba sdang ka jingïalehkai bad ban pynliem ïa ka Pachuca na Mexico da 3-1 kol.
Ka Juventus ka la lah ban pynpaw ïa ka jingkhlaiñ bor na ka bynta ban pynliem ïa ka Wydad Casablanca da 4-1 kol, katba ka Red Bull Salzburg bad ka Al Hilal ki la ïasam mar shi point hadien ba kim shym la lah ban thep kol ha ka wat ba ar jong ka jingïalehkai group.
Ka jingïakhun hapdeng ka City bad ka Al Ain ha Atlanta, la ai kyrteng da ka “Abu derby”, ha kaba u trai jong ka klob na ri Bilat bad u vice president ka United Arab Emirates, u Sheikh Mansour, u la ïakynduh pyrshah ïa la u para, u Sheikh Mohamed, uba long u President jong katei ka kynhun ïalehkai jong ka Emirati bad ïa ka ri jong u.
Haba phai sha ka jingïalehkai dei u Ilkay Gundogan uba la pynkhih jar nyngkong na ka bynta ka City ha shwa ba u Claudio Echeverri ba dang 19 snem ka rta un thep ïa ka kol ba ar lyngba ka free-kick bad u Erling Haaland u la thep ïa ka kol ba lai lyngba ka penalty ha shwa ban kut artad ka jingïakhun jong ka kylla step.
Ha ka kylla miet, u Gundogan u la pynbud biang ïa ka kol ba ar ha shwa ba ki ar ngut rangïalehkai mihpli kin ïoh mih madan. Ïa ka kol kaba san la thep da u Oscar Bobb ha shwa ba u Rayan Cherki un thep ïa ka kol kaba khatduh na ka bynta ban pynlong ïa ka City ban jop haduh 6-0 kol.
Kane ka jingjop hakhmat sawphew hajar ngut ki paidbah nongkyrshan ka la pynlong ïa ka City bad ka Juventus ban jam sha ka pre-quarter final hadien baroh ki kynhun ki la jop mar ar sien ryngkat mar 6 point ha ka Group-G.
“Mynta ngi hap ban peit la ngin long ba nyngkong ne ba ar ha ka kynhun” la pynpaw u coach ka City u Pep Guardiola uba la pynkylla lut ïa ka thup jong ki rangïalehkai ha kaba sdang hadien ba ka la jop da 2-0 kol ha ka jingïalehkai ba nyngkong pyrshah ïa ka Wydad.
“Ngi la ïalehkai kham bha khyndiat ban ïa ka jingïalehkai kaba nyngkong, khamtam ha ka kylla miet.”
Ha kawei pat ka jingïalehkai jong kane kajuh hi ka group, ka Juventus ka la jop da 4-1 kol ïa ka kynhun na Morocco ka Wydad ha Philadelphia, ha kaba u Kenan Yildiz u la long kum nongïalehkai uba kongsan.
Utei u rangïalehkai shakhmat na Turkey u la lah ban thep ar kol hadien ba katei ka kynhun kaba na Italy ka la pynkhih jar lyngba ka jingbakla thep hi da ka Wydad ha ka stadium kaba don haduh laiphew ar hajar ngut ki paidbah ha Lincoln Financial Field.
Utei u rangïalehkai u la ïoh ban thep ha kaba ka bol ka la leit dei ïa u Abdelmounaim Boutouil uba la kum thep hi pat sha kol la jong ha ka minit kaba 6. Nangta u Yildiz u la thep kol ha ka minit kaba 16 da ka jingïalehkai kaba itynnad bha bad kawei pat ha ka minit kaba 69 jong ka kylla miet ha shwa ba u Dusan Vlahovic (90+4) un thep lyngba ka penalty bad ban jop shisyndon.
Ha Charlotte, ka Real Madrid kaba la duh noh ïa u Raul Asencio tang mar ïa sdang ka jingïalehkai, ka la lah ban pynliem noh ïa ka Pachuca bad ban ïoh jingjop kaba nyngkong hapoh ka jingïalam u coach bathymmai u Xabi Alonso.
Utei u rangïalehkai shadien (Asencio) u la shah sei da red card ha ka minit kaba 7 na ka daw ba u la pynur ïa u Salomon Rondon bad utei u rangïalehkai na Venezuela u la lah ban pyllait na ka jingshah thep.
Ha katei ka jingïakhun ka Real ka la pynkhih jar nyngkong ha ka minit kaba 35 lyngba u Jude Bellingham bad la pynbud ïa ka kol ba ar lyngba u Arda Guler. Ïa ka kol ba lai la thep da u Fede Valverde ha shwa ba u Raul Valverde un thep ïa ka kol kaba khatduh na ka bynta ban jop shisyndon.
