Jowai, Jylliew 23
Ka Khynroo Khyllood Committee, Seiñraij Jwai ryngkat ka jingïatreilang bad ka Dorbar Niam ha ka 21 tarik Jylliew ka la pynlong ïa ka jingïakynduh lang ba kyrpang ha madan Knia Pyrthat, Dulong Poh-hali.
Ïa ka jingïalang la pynïaid da u Ma Raymond Nartiang Pator ka Raij Jwai bad la ïoh ka nguh blei nguh syiem na u Ma Samboon Siangbood Langdoh ka Raij Jwai.
Ki samla kiba ai jingkren ki long u Sienmiki Lato na Seiñraij Jwai uba la kren halor ka phang “Ki khynroo Khyllood ha ka Tipkur Tipkha” u Kunemiki Passah na Seiñraij Ummulong halor ka phang “Ki khynroo khyllood ha i maïa niam” bad u Sanhiwot Kyndiah na Seiñraij Shillong halor ka phang “Ki khynroo khyllood ha ka Sngi Kylliang ka Nongkylliang”.
Kaba kham kyrpang shuh shuh ha kane ka sngi, dei ka jingïohlad jong ki samla ban pyni ïa ka sap ka phong lyngba ka jingïakop tied Bom katba na ka bynta ki samla kynthei la pynlong ïa ka jingïakop “Ka Siang Ka Pha” kaba dei kawei na ki jinglehniam ba kyrpang jong ki khun ka Niamtre ha man ki ïing ki sem ha ka por Behdieñkhlam.
Lyngba ka jingriew ka bom, ka dorbar ka la long kaba shongshit bad shongkun shongkhia ha kaba ki samla na man ki dong ki la kiew rynsan ban pyni ïa ka sap ka phong bad ka rukom pyndep niam ha ka por Behdieñkhlam.
Shwa ban poi ka bynta kaba kut jong ka jingïakynduh lang, u Ma Womlin Pakyntieñ, Kñi ka Kur Pakyntieñ kum uwei na ki ‘riew rangbah ka Raij u la kren kyntu ïa ki samla halor ka phang “I tip niam tip rukom ki khynroo khyllood wa man i ku ka Niamtre”.
Ki dong ki shnong kiba ïashim bynta ha ka jingïakop tied Bom ki long ka Panaliar, Loomkyrwiang, Dulong, Loomiongkjam, Tpep-pale, Loompyrdi Iongpiah katba ha Ka Siang Ka Pha ki long ka Panaliar, Loomkyrwiang, Loompyrdi Iongpiah, Dulong bad Loomiongkjam.
