Shillong, Jylliew 23
U Sirdar ka Elaka Laitkroh, Bah Pailastar Kharkongor ha ka Lah Sngi U Blei jong ka 23 tarik Jylliew, 2025, u la plie paidbah ïa ka ïing kaba dang shu dep ban tei thymmai jong ka Khatar-shnong-Laitkroh C&RD Block ha ka jingïadonlang u Myntri Rangbah ka Jylla, u Conrad K Sangma bad ki MLA kiba kynthup ïa u Bah Gavin Miguel Mylliem bad u Bah Matthew Beyondstar Kurbah.
Haba ai jingkren ha kane ka sngi, u Myntri Rangbah ka Jylla u la ong ba ka jingkular jong ka Sorkar ka long ban kynthup lang ïa ki nongïalam shnong bad ki paidbah na ka bynta ban kyntiew ïa ka roi ka par.
“Ngi ngeit ba ka jingsynshar kaba kynthup lang ka sdang da ka jingpyntreikam kaba ïashim bynta lang. Ka jingplie paidbah ïa ki jingtei jong ka Sorkar da ki nongïalam shnong kum u Sirdar ka pyni ïa ka jingthmu jong ngi ban wanrah ïa ka jingsynshar kham jan sha ki paidbah bad ban pynrung ïa ka jingsngew jong ka jingkitkhlieh lang bad ka jinglong trai,” ong u Myntri Rangbah.
Kane ka Block Integrated Development Complex kaba la plie thymmai ka long shibynta jong ka jingthmu kaba kham ïar ban kyntiew ïa ki jingtei ha baroh 46 tylli ki C&RD Block kiba la don lypa bad 10 tylli kiba dang shu thaw thymmai ha kylleng ka jylla Meghalaya. Ka jingïarap ka thmu ban pynkylla ïa ki jingtei kiba la rim bad kiba la jot rathai sha ki jingtei kiba mynta, kiba treikam, bad kiba pynshong nongrim ha ki nongshong shnong.
“Haba ngi la shimti ïa ka kam ha u snem 2018, ngi lap ba bun ki ophis jong ki block ki la jot rathai bad sniew lut. Naduh katei ka por, ngi la shim ïa ka rukom treikam kaba long kum ka mission-mode ban pynbha ïa ki jingtei ha nongkyndong ha kylleng ki distrik. Naduh ka jingpynbha ïa ki thanat pulit bad ki ophis sub-division haduh ka jingai jingbit ïa ki jaka treikam thymmai jong ki DC, ki jaka sah jong ki nongtrei, bad ki jaka treikam ba bun rukom-ngi dang trei ban tei ïa ka nongrim kaba khlaiñ na ka bynta ka jingsynshar ba shapoh,” la bynrap biang u Myntri Rangbah.
Haba pynkynmaw biang ïa ka jingdonkam jong ka jingïashim bynta lang jong ki nongshong shnong, u Myntri Rangbah u la ong, “Ngi kwah ba ki paidbah kin ym shu sakhi ïa ka roi ka par hynrei kin long shi bynta jong ka. Da kaba khot ïa ki nongshim bynta na ka thaiñ ban plie ïa ki skhim jingïarap bad ki projek pynroi, ngi pynshlur ïa ka jingsngew sarong ki nongshong shnong kaba kham khraw bad ka jingkitkhlieh.”
Ka rukom treikam kaba pynshong nongrim ha ki briew ka dei ka rukom pynroi kaba ïatreilang kaba kheiñ kor ïa ka bynta jong ki tnat tynrai, ki nongïalam shnong, bad ki nongshong shnong ha kaba pynwan dur ïa ka jingkiew jong ka Jylla.
