Shillong, Jylliew 23
Lai ngut ki briew ki la ïap hadien ba ki la hap na ka jaka shong ba shalor jong kawei ka stadium ha Algeria tang hadien ka jingsawa kaba khatduh ha kaba ka kynhun ïalehkai phutbol jong katei ka ri, ka MC Alger ka la long ka lahduh, la pynpaw ka tnat ka koit ka khiah.
Da ki phew ngut kiwei pat ki la mynsaw haba ka jingkhang pahara ka la khyllem, ha kaba ki nongkyrshan ki la tur shakhmat ban lehkmen ha ka bynta kaba shatrai jong ka 5 July Stadium kaba ha Algiers, la ïathuh ki lad pathai khubor katei ka ri.
Palat 70 ngut ki briew ki la shah sumar ha ki lai tylli jaka sumar, la pynpaw ka tnat ka koit ka khiah bad bynrap da kaba ong ba kine bun na kiba la mynsaw la pyllait noh.
La ïathuh ba na ka liang ki nongïalehkai bad ki nongtrei jong ka MC Alger, ki la leit sha kitei ki jaka sumar ban ai snam sha kiba mynsaw.
Kumba ka paw katei ka stadium ka la shlei da ki nongkyrshan na ka bynta ka jingïalehkai kaba la pynlong ïa ka MC Alger ban ïai bat ïa ka nam lahduh jong ka league naduh ba ka la rah nyngkong mynshem snem.
Ha ka por ba ïalehkai ka la long kaba sngewkmen, ha kaba la thang ïa ka tdem kaba rong jyrngam hapoh ka stadium.
Hadien katei ka jingjia kaba sngewsih, la hap ban pynsangeh noh ïa ka jingaiti ïa ka trophy nam lahduh.
Na ka liang u President ka Algeria u Abdelmadjid Tebboune u la phah ka jingsngewlem sha kito kiba ngat ha katei ka apot bad u la khmih lynti ba kin koit noh kham kloi na katei ka jingmynsaw.
Ka MC Alger ka la rah ïa katei ka nam lahduh ha ka sien ba ar hadien ba ka la ïakhaid khlem don ba lah ban thep kol haduh kaba kut jong ka jingïalehkai pyrshah ïa ka NC Magra.
