Shillong, Jylliew 23
U Symbud Myntri Rangbah ka Jylla, Bah Prestone Tynsong haba pynpaw ba um don jingtip eiei halor ka kam bujli Myntri, u la ong ba ïa ka rai ban bujli Myntri Sorkar ka shong ha u Myntri Rangbah ka Jylla.
Ïa kane u Symbud Myntri Rangbah u la jubab halor ka jingmih khubor ba ka lah ban don ka jingbujli ïa ki katto-katne ngut ki Myntri hapoh ka Sorkar synroplang Meghalaya Democratic Alliance (MDA II) ba ïalam da ka National People’s Party (NPP) ha u bnai ban wan.
Haba kren sha ki lad pathai khubor, na ka liang jong u Bah Prestone uba dei ruh u nongïalam ka NPP Meghalaya u la ong, “Halor kata ka kam ïabujli Myntri ngam don eiei ban ong, ngam don jingtip hynrei haba ïadei bad ka jingbujli Myntri, ka shong pat ha ka rai jong u Myntri Rangbah ka Jylla u Conrad K Sangma”.
U Bah Prestone u la ong ba ka shong ha ka mon jong u Myntri Rangbah, la ka i donkam ne em ban bujli ïa ki Myntri.
Lah ban kdew ba hadien ka jingïaid ar snem shiteng naduh ba la shimti biang ka Sorkar MDA, ka la don ka jingïakren ba ka lah ban don ka jingbujli Myntri ïa ki katto-katne ngut ha u bnai ban wan.
Katkum kaba paw, ki saw ngut ki Myntri ka Sorkar MDA kiba lah ban shah bujli noh ki long u Bah Comingong Ymbon, u Bah AL Hek, u Bah Shakliar Warjri bad u Rakkam A Sangma. Katba ki saw ngut ki MLA kiba lah ban shah thung bujli thymmai ha ka jaka jong kine, ki long u Bah Wailadmiki Shylla, u Bah Sanbor Shullai, u Bah Methodius Dkhar bad u Marthon J Sangma.
Lah ruh ban pynkynmaw ba na ka liang jong u Bah Sanbor Shullai, MLA ka BJP na South Shillong Constituency, u la dep ban kren bad pynpaw ba ka la don lypa ka jingïateh kular ban ïa shimti ïa ka shuki Myntri mar ar snem shiteng bad u Bah AL Hek, MLA ka BJP na Pynthorumkhrah Constituency.
