Montana, Jylliew:
Ha kane ka khubor kaba sngew phyla, la ong ba ha ki katto- katne ki bynta jong ka Montana hapoh US, ka la don ka jinghap ïor watla ka dei ha kum kane ka aïom Lyiur, ha kaba bun ki thaiñ, ki la tap da ka ïor ha ka sngi kut taiew ba nyngkong jong ka aïom Lyiur. Ka jinglong ka suiñbneng kaba kum kane la iohi ruh ha ki bynta jong ki lum Rocky, kiba la tip ruh kum ki Rockies, bad ha ki lum Cascade.
Ka jingkhriat jong ka suiñbneng ka la sdang ha ka 20/21 tarik u Jylliew, hynrei ki nongshong shnong ha ki katto katne ki bynta jong ka ri Sepngi jong ka US ki la mad ia ka jingkhriat kaba phylla ha kum kane ka aïom. Ki nongpyndonkam social media ki la pynsaphriang ïa ki dur bad ki video jong katei ka jinghap ïor ba phylla ha katei ka nongbah, da kaba ong ruh ba ka long kaba phylla shisha haduh katta namar ba da ki million ngut ki paidbah nongshong shnong ha kylleng ki bynta pdeng bad mihngi jong ka ri pat ki don hapdeng ka jingkhluit ba jur jong ka suiñbneng.
Ha kaba sdang jong kane ka taiew, ka National Weather Service (NWS) ka la maham ba ki bynta jong ka thaiñ Shatei Lam Mihngi jong ka Montana kin shah ktah ha ka ïor kaba jur bad uba sngem ha ki jaka ba kham jrong jong ka Glacier National Park.
Namar la ong ba ka jinghap ïor ha ka por lyiur ka long ka bym ju kham jia koit, watla katta, la ong ba kane ka lah ban jia ha ki bnai lyiur ha ki katto- katne ki bynta jong katei ka ri, bunsien ha ki jaka ba jrong ne ha ki jaka kiba don ka jinglong ka suinbneng kaba kham pher.
Kumta la ong ba ki paidbah ki la pynsaphriang ia ki dur bad video ha ki rynsan ‘Social Media’ ha katei ka sngi, da kaba pynpaw ia ka jinglong ba phylla jong katei ka ior bad ong ba ka long kaba sngewlynngoh hynrei ka long ruh ka jingkyrkhu.
