Shillong, Jylliew 23
Ki pulit jong ka East Khasi Hills ki la ïoh ban kem noh ïa ki saw ngut ki briew kiba la kynnoh donkti ha kaba tuh ïa ki mar ki mata jong ki nongwan jngohkai pyrthei kiba na Mumbai.
Ha ka kyrwoh khubor na u Superin-tendent of Police (SP) ka East Khasi Hills, Bah Vivek Syiem, u la ong ba kine ki saw ngut kiba la shah kem noh ki dei ba la tip kyrteng kum u Chaphrang Nangkiew Sutnga, 24 snem na Maw -blei, u Wanjop Kharumnuid, 23 snem na Laitkor Nonglum, u Albertstar Khar-hujon, 22 snem na Umphyrnai bad u Michael Nongrum, 45 snem na Demthring Block A.
U SP u la ïathuh ba ha ka janmiet jong ka Sngi U Blei, kata ha ka por 8 baje eiei, u Jay Nand Kishore Joshi bad ki bahaïing jong u ryngkat bad ar ngut ki shikurim kiba dei ki nongjngohkai pyrthei na Mumbai kiba la wan sha kane ka jylla, ki la pynïeng ïa ka kali jong ki, ka Innova hajan jong ka Mahindra Showroom, Mawblei ban leit bam ja miet ha ka ‘By the Way Restaurant.
La ong ba hadien ba ki la dep bam bad wan phai, ki la shem ba ki la don mano-re-mano kiba la pynpait ïa ka ïit jingkhang jong ka kali bad ban rong tuh noh ïa ka synduk jong ki kaba la thep ruh ïa ka pisa kaba T.50 hajar bad ka Iphone 13. Ha kaba ïadei bad kane, ki pulit ki la register ïa ka mukotduma ha thanat Madanrting.
Ha ka jingtrei shitom bad tang hapoh 24 kynta, ki pulit ki la ïoh ban kem noh ïa baroh saw ngut kiba la donkti ha kane ka kam, bad la kem ïa ki na Mawblei Block-B bad ruh ban kurup ïa ki tiar lem bad ka pisa.
