Shillong, Jylliew 23
Ka East Khasi Hills Local Taxi Welfare Association (EKHLTWA), ha ka Lah Sngi U Blei ka 23 tarik u Jylliew 2025 ka la leit sha ka shlem treikam u DTO, Shillong ban pynpaw ïa ka jingpyrshah halor ka jingbthah ka Sorkar Jylla ban pyndait ‘Tracking Device’ sha baroh ki local taxi kiba kamai hapoh ka Jylla.
Ha ka jingïakren bad ki lad pathai khubor, u Bah Shan Kharmujat Organising Secretary u la ong, ba ka seng kam sngew ïahap halor kane ka hukum ba pynmih da ka Sorkar Jylla.
U la ong ba ka jingshngaiñ (security) jong ki local taxi ka la ithuh lypa ba ka dei ka rong ïong bad ka rong stem bad kumjuh ka High Security Registration Plate (HSRP) bad lada ngin teh sa ïa kane ka Tracking Device kam sngew ïahap.
“Kumba na ka por sha ka por ka seng ka ïai dawa hynrei ka sorkar kam pynsngap bad khlem ai ïa kaei ba ka seng ka dawa bad ka sorkar ka pynbor pynban ïa kiei kiba ngim sngew lah ban pdiang. Kumta na ka liang ka seng kam lah ban pdiang bad ngin ïai pyrshah ïa kaei kaba ka sorkar ka leh,” la ong u Bah Kharmujat.
Shuh shuh u la ong ba kane ka jingleh jong ka sorkar ban buh ïa ki ‘tracking device’ ka dei naduh ba jia ki jingjia hapoh Sohra, kaba dang shu jia shen ha kine ki taïew ba la dep halor ka jingshah pynïap u Raja Raghuvanshi. U la ong ba ngi tip shai ba ki briew kiba leh ïa kine ki kam sniew ki dei hi kiba nabar ym na ka jylla jong ngi, bad ka jingleh jong kita ki briew kiba nabar, ka sorkar ka nioñ pynban ïa ki trai ri trai muluk.
“Haba ka sorkar ka kwah ban leh ïa kane ka ‘Tracking Device’ ka dei ban pyrkhing shwa ïa ki kali kiba nabar namar ngi ha Jylla la jong ngi dei ki briew kiba don burom bad ba don akor bad ngi pdiang da ka jingkhuid mynsiem bad ngi shakri ïa ki paidbah ba wan jngohkai pyrthei da ka jingkhuid mynsiem bad kiba leh ïa kane ka kam pynïap briew dei ki briew kiba nabar,” u la ong.
Kumta ka seng ka dawa na ka Sorkar Jylla ba ka dei ban pyrkhing ïa ki kali kiba nabar bad phah teh ‘Tracking Device’ ïa ki kali kiba nabar namar ngi ki trai ri trai muluk ngin ym treh ïa kane ka hukum ka Sorkar Jylla. Da kaba ong ba lada ka sorkar ka leh da ka bor ruh ka seng kan sa shong pyrkhat kumno ngin shim ïa ka rai nangne shakhmat.
