Shillong, Jylliew 23
Ka General Meeting jong baroh ki nonghikai Government Upper Primary Schools kaba hap hapoh ka Eastern West Khasi Hills District ha ka jingdonlang u President ka AMGUPSTA Central Body Bah Jesperly Kharryja bad Organising Secretary Bah Apborsing L. Mawlong kaba la pynlong ha ka Lah Sngi U Blei ka 23 tarik u Jylliew 2025 ha Mairang da kawei ka jingmut ka la rai ban thaw noh ïa ka All Meghalaya Government Upper Primary School Teachers Association- Eastern West Khasi Hills District Unit (AMGUPSTA-EWKHDU).
Ha kane ka jingïalang la jied bad pynskhem ïa ki Nongkitkam jong ka Unit ba kynthup ïa u President Bah Wadbor Warjri, Vice President Bah Teibor Royal Roy Thabah, General Secretary Bah Welbirthstone L. Nonglait, Assistant Secretary Bah Donboklang Rekon Lyngdoh, Finance cum Treasurer Kong Fullymerry Lyngdoh, Organising Secretary Bah Sandy Marbaniang, Advisers Bah Nobas Lawrniang, Bah Apborsing L. Mawlong, Kong Didimora Syiemlieh, bad ki dkhot Executive Members ki long u Bah Elpius Lyngkhoi bad u Bah Tanborlang Lyngdoh.
Ka jingthmu ban pynkha thymmai ïa kane ka Unit ka long kum shibynta ban nangpynkhlaiñ shuh-shuh ïa ka jingïatylli, ka jingïatreilang para nonghikai Government Upper Primary School, ban weng ïa ki jingeh ba ki nonghikai ki ïakynduh, ban kyntiew ïa ka bha ka miat ha ka jingshakri ïa ka kam bad ban khring ïa ka jingïadei bajan hapdeng ki nonghikai bad ka sorkar khnang ban lah ban wanrah ïa ka jingshakri ba khambha lyngba ki Government U.P. Schools hapoh ka District bad ka Jylla.
