Shillong, Jylliew 23
Ka Sorkar Jylla ka la pynmih ïa ka hukum ba baroh kiba shong die jingdie madan ki dei ban kynriah noh shisyndon na Khyndai Lad hapoh lai sngi naduh ba la pynmih ïa ka jingpynbna.
Ïa kane ka hukum la pynmih ha ka 21 tarik u Jylliew 2025 da u Chairman ka Town Building Committee and Chief Executive Officer Shillong Municipal Board.
Halor kane ka jingpynmih hukum na ka Sorkar Jylla ba ki nongshong die jingdie madan ki dei ban kynriah noh na katei ka jaka, ka la mih ka jingpyrshah kaba jur bha na ki nongshong dukan ha ka Khyndai Lad ba kin ym pdiang bad kin ym kynriah satia da lei-lei ruh na katei ka jaka.
Na ka liang u nongthoh khubor jong U Nongsaiñ Hima ha ka Lah Sngi U Blei, ka 23 tarik u Jylliew 2025, u la leit ban ïakynduh ïa ki nongshong die jingdie madan ha Khyndai Lad ban ïakren la kin kynriah ne kin shong beit ha katei ka jaka.
Ha ka jingïakren bad ki nongshong die jingdie madan ki la ong ba ngin pyrshah beit ïa kane ka hukum ba la pynmih da ka Sorkar Jylla ba baroh kiba shong die madan ha Khyndai Lad ki dei ban kynriah noh na katei ka jaka bad ban leit shong ha khrum jong ka MUDA.
Ki la ong ba lada ngin kynriah na kane ka jaka ha Khyndai Lad shaei ngin leit, namar ka jaka ba ka sorkar ka ai ruh ka dei ha khrum MUDA bad ka long ka jaka ka bym biang ban leit die jingdie bad ki ong ba lada ngin leit sha ka jaka ba la ai ka sorkar ha MUDA kan bha ïa ngi ba ngin shu leit khrong noh namar kam myntoi.
Lada ka sorkar ka pynkynriah na kane ka jaka ha Khyndai Lad kaba dei ka jaka ba ai ja ïa ngi bad kaba kyrshan ruh ha ïing ha sem kan ktah shibun ïa ka kamai-kajih namar lada ngi shong ha Khyndai Lad ngi dang ïoh ka bai sngi ban pyndap ha ïing ha sem.
“Lada slap ne lyer ruh ngi dang ïoh ban ïa die hynrei lada ngi leit shong shawei ngim ïoh eiei,” la ong ki nongshong die jingdie madan.
Ki la ong ruh ba lada ka sorkar kan wan leh da ka bor ban pynkynriah ïa ngi na Khyndai Lad ngi ruh ngin ym shah da lei-lei.
“Ka Sorkar Jylla haduh kine ki sngi ba mynta ka pynshongsuk ïa ki Khar Metor hynrei ïa ngi pat kiba dei ki trai jylla ki trai kiba dei hok ban shong die jingdie ka thmu ban wan kyndang. Ka sorkar ka dei ban peit shwa ïa ki Khar Metor,” ki la ong.
Nalor kane, ki la pynpaw ka jingpyrshah kaba jur ïa ka jingthmu ka sorkar ban pynkynriah na Khyndai Lad, da kaba ong ba lada ka sorkar kan kyndang shwa ïa ki Khar Metor bad ban ai ïa kiba shong die madan ha katei ka jaka kin pdiang shispah per cent ban kynriah noh na Khyndai Lad, hynrei lada ka sorkar kam ai ha Them Metor ngin ym kynriah na Khyndai Lad.
“Ban pynkynriah na Khyndai Lad ngin nym pdiang namar ba ngi im ja bad ïoh phah skul ïa ki khun na kane ka jaka bad lada ka sorkar kan weng ïa ngi na Khyndai Lad shaei ngin leit namar ka jaka ba ai ka sorkar ruh kam biang ban leit shongdie jingdie bad ka long ka jaka kaba kynjah,” la bynrap kiba shong die madan.
Halor ka jingong ka sorkar ba ka jingthmu ban pynkynriah noh ïa kiba shong die jingdie madan ha Khyndai Lad ka dei namar ba ka la khim bad pynkhapngiah ïa ka lynti ïaid u paidbah, na ka liang kiba shong die jingdie madan ki la ong, ba ka jingkhapngiah ka Khyndai Lad kam dei ka jingshong die jingdie jong ki, hynrei ka dei namar ka jingwan ïaid ki kali kaba la pynkhapngiah shibun ïa ka lynti.
“Ka sorkar ka dei ban sngewthuh ba kumno kan shu beh ïa ngi kiba shong die jingdie madan ha Khyndai Lad haba baroh ngi dei ki briew na ka jylla Meghalaya bad ban leh jubor kan ym ïahap da lei-lei ruh. Ka jingleh ka sorkar ban shu pyndik man u snem ban phah weng noh ïa kiba shong die jingdie madan. Kumno ka sorkar ka wit ïa ngi haba ka lynti ka long kaba kylluid bha ha khyndai lad,” la ong ki nongdie madan.
Shuh shuh ki la ong ruh ba ngim dei ba ngin pyneh ïa ka jingthmu ka sorkar ban pynkylluid ïa ka lynti bad ngi sngewtynnad hi ruh ba ka sorkar ka dang pyrkhat na ka bynta jong ngi kiba shong die madan. Pynban ki la ong ba lada ngin mih na kane ka jaka kin sa wan kiwei pat ban wan shong die jingdie ha Khyndai Lad bad lada ka sorkar ka kwah ban pynkynriah ka dei ban pynkynriah lut ïa baroh ki dukan ha Khyndai Lad ban ym don shuh wat kawei ruh ka Food Stall ne kino-kino ki dukan ki ban die ban thied bad ka dei ban long thylli beit.
