Shillong, Jylliew 23
Ka kynhun na ka Meghalaya Legislative Assembly (MLA) ka la ïashim bynta ha ka jingïalang ba ar sngi ka National Conference jong ki Estimates Committees na Parliament bad ki Jylla, ki Union Territory Legislatures, kaba la long ha Maharashtra Legislative Assembly, Mumbai, naduh ka 23 tarik haduh ka 24 tarik u Jylliew 2025.
La lamkhmat ïa kane ka kynhun da u Bah Mayralborn Syiem, MLA ka Nongpoh, uba long ruh u Chairman jong ka Committee on Estimates, ryngkat bad ki dkhot ka Committee u Bah Renikton Lyngdoh Tongkhar (Mawkyrwat), u Bah Wailadmiki Shylla (Jowai), ka Miani D Shira (Ampati), bad u Arbinstone B Marak (Selsella). Ka kynhun ka la don ryngkat ruh bad u Commissioner & Secretary u Andrew Simons bad kiwei pat ki heh Sorkar na ka Meghalaya Assembly Secretariat.
La plie pyrda ïa kane ka jingïalang da u Om Birla, u Lamphang ka ïingdorbar Lok Sabha. Ka phang jong mynta u snem ka dei, “Ka Kamram jong ka Estimates Committee ha ka Jingpeitngor bad ka Jingbishar Bniah ïa ka mang tyngka ban pynthikna ka Jingtreikam ba seisoh bad ka Jinglut Jingsep ha ka Synshar-Khadar.”
U Bah Mayralborn Syiem u la ïashim bynta shitrhem ha ki jingïakren da kaba ai ruh ki jingshai halor ka rukom treikam jong ka jylla Meghalaya ha ka liang jong ka jingïakheiñ jinglut jingsep ha ka synshar paidbah, ka jingïaid beit jong ki skim pisa, bad ka jingkitkhlieh jong ki paidbah lyngba ka jingpeitngor jong ka ïingdorbar.
