Guwahati, Jylliew:
U Myntri Rangbah ka Assam, u Himanta Biswa Sarma, ula pynbna ha ka Lah Sngi U Blei, ba ki don 97 ngut ki briew, kiba la shah kem ha ka jylla, ha kaba donkti bad ki kam pyrshah ri bad ki kam pyrshah ïa ka niam Hindu, hadien ka jingthombor jong ki lehnoh ha Pahalgam, Jammu & Kashmir, kaba la pynlong ïa 26 ngut ki briew ban ïap bad bun ngut kiba la mynsaw ha ka jingjia kaba la jia ha ka 22 tarik, Ïaïong.
Kiba dang shu shah kem dang shen ki kynthup ïa uwei uwei u briew na ki distrik jong ka Tinsukia bad Nagaon.
Ha ka jingthoh ha ka rynsan X, u Sarma u la ong, “Ka jingpynshitom beiñ ïa ki kynhun pyrshah Hindu ka dang ïai bteng… 97 ngut ki nongleh kam sniew kiba pyrshah ïa ka ri bad ki nongleh kam sniew kiba pyrshah ïa ki Hindu ki don ha lyndet ki jingpyntreikam jong ka aiñ mynta.”
Katkum ka jingong u Myntri Rangbah ka jylla, utei u briew uba la shah kem na Tinsukia u la sam ïa ki jingthoh kiba pyrshah kiba thmu ïa ka niam Hindu ha ki Social Media, katba u briew na Nagaon u la kren pynjah burom ïa u Lord Ram.
Kane ka jingpyntreikam ka la ïoh bor hadien ba la kem ïa u MLA ka AIUDF u Aminul Islam halor ka jingkynnoh pynkhihwin.
U Islam u la shah kynnoh ba u ïada ïa ka Pakistan bad ka jingdonkti jong ka ha ka jinghiar thma ha Pahalgam. Wat lada la ai jamin ia u, hynrei hadien kata la set ia u hapoh ka aiñ pahara ri (NSA).
U Myntri Rangbah ka jylla u la shim ïa ka sienjam kaba tyngeh pyrshah ïa ki kam pyrshah ri.
Ha ka 2 tarik u Jymmang, ha ka jingïalang elekshon panchayat, u Sarma u la maham ba kino kino kiba pynmih ïa ki jingpyrta kum “Pakistan Zindabad” kin mad ïa ki jingeh kiba shyrkhei, kynthup ïa ka jingbyrngem “ban pyndkoh ïa ki kjat jong ki.”
Ka jingshah thombor ha Pahalgam, kaba la thmu ïa ka jaka jngohkai pyrthei kaba pawnam ha ka thaiñ ba shaphang Shathie jong ka Kashmir, kaba la shim ïa ka jingim jong ki 26 ngut ki briew, khamtam eh ki nongjngohkai pyrthei, bad pynmynsaw ïa ki katto katne ngut kiwei pat.
Ki bor ïada ki la bteng ban pynlong ïa ka jingothkit ha kaba ïadei bad ka kam thombor, ka Assam ka la ïaleh katba lah ban pynshitom da kaba tyngeh ïa ki runar kiba la don jingthmu ban wanrah ki kynrum kynram bad ki jingkhihwin ha ka jylla.
