Shillong, Jylliew 23
Ka ïingbishar Meghalaya High Court ha ka Lah Sngi U Blei ka la pynsangeh shipor ne sospon ïa ka hukum ba la pynmih da ka Executive Committee (EC) ka Voice of the People Party (VPP) ha Khasi Hills Autonomous District Council (KHADC), kaba kheiñ ïap ïa ka hukum thungkam pura ïa palat 30 ngut ki nongtrei casual.
Ka hukum ka KHADC ba la pynmih ha ka 30 tarik Jymmang, 2025, ka la shah pynsangeh ha ka ïingbishar hadien ba hynriew ngut ki nongtrei, kynthup ïa 4 ngut ki Junior Engineer bad 2 ngut ki Junior Architect, ki la leit tynjuh pyrshah ïa ka hukum jong ka Council hakhmat ka aiñ.
Kine ki nongmudui ba kynthup ïa u Wallam -jinghun Nongsiej, Andrew Mulieh, Moodi-field Lyngdoh, Laribok-lang Marbaniang, Dale-Mid-Gift Marbaniang, bad Saffiona Dkhar, ki la shah thung kam pura hadien ba ki pyndep ïa ka kam contract palat shisnem hynrei ka EC ka KHADC ka la kheiñ ïap ïa ka hukum thungkam pura jong ki ha ka 30 tarik Jymmang, 2025, khlem da ai kano-kano ka jingpyntip lane ai ïa kano-kano ka lad ban sngap lem ïa ki jingpynsngew kine ki nongtrei ba shah ktah.
U Wallamjinghun bad Lariboklang ki la shah thung kum ki contract Junior Engineer ha ka 16 tarik Nailar 2023, katba u Andrew bad Moodifield ki la shah thung ha ka 31 tarik Nailar, 2023 halor ka jingpynbna laitkam ba la pynmih ha ka 25 tarik Naitung, 2023 bad 22 tarik Nailar, 2023.
Hadien ba ki la pyndep ïa ka jingshakri palat shisnem kum ki nongtrei contract, ïa ka jingshakri u Wallamjinghun bad Lariboklang la pynskhem ne thungkam pura noh kum ki Junior Engineer ha ka 24 tarik Kyllalyngkot 2025, katba ïa u Andrew bad Moodifield la pynskhem ne thungkam pura ha ka 1 tarik Risaw, 2024, kaba long katkum ka rai jong ka Executive Committee jong ka KHADC.
U Dale-Mid-Gift bad Saffiona ki la shah thungkam ha ka 26 tarik Risaw, 2023 bad ha ka 20 tarik Nohprah, 2023 katkum ka jingpynbna laitkam ba la pynmih ha ka 22 tarik Nailar, 2023. Ïa ka jingshakri u Dale Mid Gift la pynskhem ne thungkam pura kum u Junior Architect ha ka 1 tarik Risaw 2024, katba jong ka Saffiona la pynskhem ne thungkam pura ha ka 24 tarik Kyllalyngkot, 2025.
Ha ka hukum, ka ïingbishar Single Bench ba la khlieh da u Justice B Bhattacharjee ka la shem ba ka Office Order (KHADC) ba la tynjuh, kam shym la pynpaw satia ba ki ‘applicant’ ki la ïoh ïa ka byrta (notice) lane ai ïa kano-kano ka lad ban sngap ïa ki ha shuwa ka rai ban kheiñ ïap ïa ka jingthungkam pura ïa ki kum ki Junior Engineer.
Ka la ong ruh ba wat lada ha kane ka hukum ba la tynjuh, la pynpaw ba ka jingthungkam pura ïa ka jingshakri jong kine ki ‘applicant’ ka long shabar jong ka rule kum ka daw ba kheiñ ïap noh ïa ka jingthungkam pura ïa ki, hynrei ym shym la don kano -kano ka jingbatai ban pyni ba kiei kita ki kyndon jong ka rule ba ym shym la bud haba thungkam pura ïa ka jingshakri jong kine ki applicant.
“Namar kata, ïa mynta, la sngew ïahap ban sospon shuwa ïa ka jingtreikam jong kane ka hukum ka KHADC ba 30 tarik Jymmang, 2025 tad haduh ka sien shong bishar ban wan,” ong ka ïingbishar.
