Shillong, Jylliew 23
Ka jingthmu bad jingtyrwa ban pynkylla noh sha ka surok Four-lane, ïa ka surok na Umïam sha Shillong, ka lah ban ym urlong shuh hadien ba ka Sorkar Jylla ka la rai ban pyndam noh ïa kane ka jingtyrwa.
Ïa kane ka rai ban pyndam noh ïa katei ka jingtyrwa, la pyntip da u Symbud Myntri Rangbah ka Jylla u Bah Prestone Tynsong uba khmih ruh ïa ka tnat PWD (Roads).
Haba kren sha ki lad pathai khubor, u Bah Prestone u la ïathuh ba ha ka jaka jong kane ka projek, ka Sorkar kan sa shna bad pynheh noh ïa ka surok sha ka 2-Lane bad pyntip pat ba ka jingïar jong ka surok kan long 10 meter kynthup ka lynti ïaid kjat.
U Bah Prestone u la ong, dang shen u la lum ïa ka jingïalang bishar kam ha nongbah Delhi hapdeng ka tnat National Highways & Infrastruc-ture Development Corpo -ration Limited (NHIDCL) ha ka jingdonlang ki ophisar ka tnat PWD (Road) ka Sorkar Meghalaya.
U Bah Prestone u la ïathuh ba ha ka kaiphod ba nyngkong ba la wanrah da ka NHIDCL, ka la kdew shai ba kam long ban pynkylla surok 4-Lane ïa ka surok na Umïam ha Ri-bhoi District sha Shillong ha East Khasi Hills.
U la ïathuh ba ka kaiphod ka kdew ba ka jinglut jingsep ka jur bha lada pynkylla surok 4-Lane naduh Umïam sha Shillong bad dei namar kane ba ka Sorkar Jylla ruh ka la rai ban pyndam noh ïa ka projek hynrei yn shu pynheh noh ïa ka surok 2-Lane kaba naduh Umïam sha Shillong.
“Hadien ka jingïalang bad ka NHIDCL bad ka tnat PWD (Road), ngi la rai ban pyndam noh ïa ka jingthmu ban pynkylla surok 4-Lane ïa ka surok na Umïam Ri-bhoi District shaduh Shillong ha East Khasi Hills. Ngi la rai ruh ban pynheh ïa ka surok kynthup ïa ki jaka ïaid kjat na Umïam sha Shillong,” la ong u Bah Prestone.
