Shillong, Jylliew 23
U Chairman jong ka ICC, u Jay Shah ha ryngkat ka BCCI ki la rakhe ïa ka sngi kaba kyrpang ba la tip kum ka ‘International Olympic Day’ ha ka Lah Sngi U Blei, da kaba kynmaw burom ïa ka jingwanphai biang jong ka jingïalehkai kriket sha ka Olympic.
Kane ka jingrakhe ka long kum ka jingpynshlur ïa ki briew ban shim ïa ki sienjam ban ïoh ïa ka met kaba koit-khiah da kaba khot ïa kiwei pat ban ïashim bynta ha ki jingkilan met.
Ka Olympic Day ka dei ka jingseng ïa ki jingïalehkai Olympic Games naduh u snem 1894 bad la rakhe ïa ka ha ka pyrthei hi baroh kawei man u snem ha ka 23 tarik u Jylliew ban kyntiew ïa ka jingïalehkai bad ka jingkilan met.
“Ka kriket ka ju pynïatylli ïa ngi, bad mynta, ka dei ka bynta jong ka jingïalehkai Olympic. Ha kane ka Olympic Day, to ngin rakhe ïa ka bor jong ka jingïalehkai ban ai mynsiem, pynïasoh, bad kyntiew. La khot ïa baroh na ka bynta ka jingïaid kjat, ka jingïamareh, lane ka jingïalehkai kriket, bad shim ïa ka sienjam sha ka jingïaid lynti kaba kham khlaiñ, kaba koit-khiah na ka bynta ka ri India jong ngi.” To ngin wanrah ïa ka jingïalehkai Olympic sha la ïing!” la pynpaw u Shah ha ka rynsan social media.
“Lyngba kane ka sienjam, ngi khot sngewbha ïa phi ban jied ïa ka +1 jong phi bad ban ïaid – la ka long ka jingïaid kjat, ka jingïamareh, ne ka jingïalehkai kriket. Ryngkat, ngi lah ban tei ïa ka India kaba koit-khiah, kaba ïatylli, namar haba ngi ïaid ryngkat, ngi ïaid kham bha. To ngin pynlong ïa ka jingangnud jong ngi kaba shisha – ka Olympic ha India!,” la pynpaw ka BCCI ha ka rynsan social media.
Kumba ka long mynta ka jingïalehkai kriket kan wanphai biang sha ka Olympics ha Los Angeles ha u snem 2028, hadien ba ka la ïoh ban mih madan ha ka Paris Games ha u snem 1900. Ïa kane ka jingïalehkai la pynrung hadien ka jingïalang jong ka IOC ha Mumbai ha u Risaw 2023.
Te kumta ka kriket kan ïasoh lang ryngkat bad kiwei ki jingïalehkai kiba thymmai ha ka LA 28 kynthup ïa ka baseball, softball, flag football, lacrosse bad ka squash.
Ka kriket ha ka LA Olympics kan don 6 tylli ki kynhun ha ka liang ki shynrang bad kynthei. Ka rukom ïalehkai kan long ha ka dur jong ka T20, kynthup ïa ka Asian Games ha u snem 2010, 2014, bad 2023 na ka bynta baroh ar ki jingïakhun jong ki shynrang bad kynthei, bad ka Birmingham 2022 Commonwealth Games na ka bynta ki kynthei.
