Shillong, Jylliew 23
Ka jingjur jong ki kam tuh kam thiem ka la nang bteng na kawei ka sngi sha kawei pat haduh ba wat ki ophis Sorkar ruh kim shngaiñ shuh namar ki runar ki la prong bad ban tuh ïa ki tiar.
Katkum ka khubor kaba la ïoh na ki pulit la ong ba ka Deputy Commissioner bad Chairperson jong ka DDMA ka East Khasi Hills, Shillong ka la ai ka jingujor ba ha ka 17 tarik mynta u bnai, ha ka por kumba 4.58 mynstep, uwei u runar bym lah ban ithuh, u la prong tuh hapoh ka shlem treikam jong ka District Disaster Management Authority, East Khasi Hills.
La ong ba une u runar hadien ba u la prong tuh hapoh katei ka shlem treikam, u la tuh ïa uwei u beteri jong ka generator. Kane ka jingjia baroh, la ïoh ring dur hapoh ka kor CCTV. Ha kawei pat ka khubor, u Bah M Marbaniang u la ai ka jingujor sha ki pulit ba ha ka step jong ka 12 tarik mynta u bnai, ki runar bym lah ban ithuh, ki la prong tuh hapoh ka shlem treikam jong ka MBOSE kaba don ha Lachumiere, Shillong bad ha kaba ki la tuh ïa ki beteri, ki power cords bad ki waïar na ka generator jong kane ka shlem treikam. Ha kaba ïadei bad kane, na ka liang jong ki pulit ki dang pynlong ïa ka jingtohkit ban lap ïa ki jingshisha bad ban thwet ïa ki runar kiba donkti ha kane ka kam.
