Shillong, Jylliew 24
U Bah Lektor Dkhar kum nongwad RTI na Khleh Myntriang u la leit ban ïakynduh ïa u MP ka Lok Sabha na Shillong Parliamentary Seat Kon-stitwensi, Dr. Ricky A.J Syngkon ban phah tuklar halor ka jingbym ïoh ïa ka jubab kaba shai na ka ophis treikam u Execu-tive Engineer PHE Elect-rical Division Khimu-siang ha kaba ïadei bad ka jingbym lah ban pyndep ïa ka skhim Jal Jeevan Mission (JJM) ha ki shnong kiba don ha East Jaiñtia Hills District (EJHD).
Haba ïakren bad ki lad pathai khubor, u Bah Lektor u la ong ba ki jubab ba u la ïoh halor ka jingbymlah ban pyndep ïa kane ka skhim mynta la kumba hynriew snem eiei bad dei beit lyngba ka jingdon ka khlam covid-19, ka jingtwa khyndew nalor kiwei-kiwei bad kane ka long kaei-kaei ka bym lah ban pdiang.
U la ong ba ngi la phah ka jingkyrpad na u MP ban ïakren sha Parliament ïa kane ka mat ha kaba ïadei bad ka skhim JJM ban wad jingtip kaba bniah na ka Ministry of Jal Shakti ban tip ïa ka jingpyntreikam ïa kane ka skhim.
“Ngi la kyrpad ruh ïa u MP ba un phah ïa ka khubor sha ka Central Government khnang ba kin leh ïa ka Independent Inquiry lane ka jingtohkit laitluid ban tip kaei ka jingshisha halor ka jingpynslem ban pyntrei ïa kane ka skhim JJM,” la ong u Bah Lektor.
U la ong, ba ka umbam-umdih ka dei ka hok jong ki nongshong shnong ban ïoh ïa ka umbam-umdih kaba khuid bad suba hynrei u la buh jingkylli, balei haduh mynta ngim pat ïoh ïa kane ka hok kaba ngi kum ki nongshong shnong ngi dei ban ïoh?
Namar kata, u la ong ba na ka liang u MP un sa tohkit bha ïa kane bad un leh kham kloi khnang ba ki paidbah ka Jylla kin shai ba kaei ka jingshisha bad kaei kaba la jia ha kaba ïadei bad kane ka skhim JJM. Hato ka don ne em ka jingbamsap? Bad u la bynrap ba lada don ka jingbamsap halor kane ka skhim JJM, ka aiñ na ka sorkar pdeng kin pynshitom ïa kum kine kiba pyrshang ban tuh im-im peit-peit ïa ka hok jong ki paidbah.
Shuh-shuh, u la ong ba ngi da kyrmen ba lyngba ka jingïakren bad tohkit na ka liang u MP, kin sa lap ïa ki jingshisha baroh halor ka jingpynslem ban pyntrei ïa ka skhim JJM ha East Jaiñtia Hills District.
