Shillong, Jylliew 24
Kan dei ka sien kaba nyngkong eh ba ka Sorkar Jylla ka la ai jingïarap da ka song pisa kaba T. 39,17,64,000 sha 26 tylli ki synjuk ïalehkai kaba long shi bynta ban pynkhreh ïa ka 39th National Games kaba la buh ban pynlong ha u snem 2027 ha Meghalaya.
Ïa kane ka jingai jingïarap la pynlong ha ka Sngi Ba-ar ha State Convention Centre, Shillong ha ka jingïadon lang u Myntri Rangbah ka Jylla u Conrad K. Sangma kum kongsan, kumjuh u Myntri ka tnat ïalehkai Bah Shakliar Warjri kum symbud kongsan, ka Myntri ka tnat ka koit ka khiah Kong Ampareen Lyngdoh, ki ophisar ka tnat ïalehkai lem bad ki nongïalam na ki synjuk ïalehkai bapher bapher.
Kane ka jingnoh synñiang sha kitei ki synjuk ka long na ka bynta ban thied hi ïa ki tiar ïalehkai, ka jingwanrah ïa ki coach kiba kynsai, kumjuh ka jingpynlong ïa ki prokram jied ïa ki khynnah kiba kynsai nangne shakhmat bad ruh ban ai jinghikai ïa ki khnang ba kin long kiba la khreh na ka bynta katei ka lympung kaba heh duh jong ka ri.
Haba ai jingkren ha katei ka sngi, u Conrad u la pynpaw ba kum ka Jylla ka ban pynlong ïa ka National Games ha u snem 2027, ka dei ban don ïa ka thong na ka bynta ban khur takma kumba 50 tylli eiei. “Wat la ngi la lah ban khur 5 tylli ki takma ha ka 38th National Games 2025 kaba la long ha Uttarakhand, hynrei haba ngi ïoh ban pynlong ha ka jylla la jong ngi dei ban don ïa ka thong ban khur 50 tam ki takma. Te kumta ban pynurlong ïa kane ka jingthmu, na ka liang ka Sorkar ngi donkam ban ai jingkyrshan pura ïa ki synjuk ïalehkai khnang ba kin lah ban pynurlong ïa ka thong.”
Halor katei ka lympung, ka Sorkar ka la ïaid shakhmat ki jingmaramot bad ban tei ïa ki jaka ïalehkai kiba don ha kylleng ki district jong ka Jylla kiba la kot haduh T. 1900 klur kiba kynthup ïa ka Jawaharlal Nehru Sports Complex kaba don ha Polo, ka International Stadium ha Mawkhanu, ka Wahïajer Stadium, ka PA Sangma Stadium nalor kiwei pat.
Halor ka jingkylli na ki nongthoh khubor hadien ka jingïalang ba haduh katno ka jingwan ki nongshim bynta, u Myntri Rangbah u la ong, “Ngi khmih lynti ba haduh 10 hajar ngut ki nongshim bynta lem bad ki official kin wan shim bynta ha ka National Games ha Meghalaya.”
Ha kawei pat ka liang, u Bah Shakliar u la kyntu ïa ki synjuk ïalehkai ba ki dei ban don ïa ka jingkitkhlieh na ka bynta ban saiñ dur ïa lawei ki nongïalehkai bad khamtam eh haba ka Jylla kan pynlong ïa katei ka lympung kaba heh duh jong ka ri ha u snem 2027.
U la ong ba ki snem kiba kham mynshwa ym pat ju don koit ki ban theh ki lad jingïarap na ka bynta ki synjuk ïalehkai ne sha ki nongïalehkai kiba don ïa ki sap ïalehkai ba kyrpang, hynrei dei naduh u snem 2018 ter ter bad haduh mynta ka Sorkar Jylla ka la theh ki lad jingïarap sha ki synjuk ïalehkai bad kumjuh sha ki nongïalehkai kiba la wanrah burom ïa ka Jylla hi baroh kawei.
Shuh shuh u la ong ba kane ka jingnoh synñiang sha kine ki synjuk ïalehkai kan ym kut noh, hynrei nangne shakhmat ka Sorkar kan ïatreilang ban nang theh shuh-shuh ki lad jingïarap khnang ba ka jingangnud jong ka Jylla ha ka National Games kan long kaba seisoh.
