Shillong, Jylliew 24
Kum ka jingpynkynmaw ïa ka Sorkar Jylla halor ka jingdawa ka Khun Hynñiewtrep National Awakening Movement (KHNAM) kaba la ïaid mynta la bun snem haba ïadei bad ban ym ailad shuh ïa ki kali kamai Tourist kiba wan na kiwei pat ki Jylla ban kamai ha kane ka Jylla, ha ka 24 tarik Jylliew, 2025, ka seng ka la leit ban buh biang ïa ka dorkhas ha ka ophis treikam u Myntri Rangbah ka Jylla, Conrad K. Sangma.
Haba kren sha ki lad pathai khubor, u Bah Thomas Passah, Working President, u la ong ba ka Seng naduh u snem 2017, ki la aiti ïa ka jingai jingmut sha ka Sorkar, ha kaba ki la dawa ïa ka Sorkar ba ki kali ki bym shym la pynrung kyrteng ha ka Jylla Meghalaya ki dei ban sangeh noh ha ki jaka ba la buh bad ba kim dei ban leit sha ki jaka jngohkai pyrthei hynrei kiba dei ban kit ïa ki nongjngohkai pyrthei sha ka jaka jngohkai pyrthei ha ka Jylla, ki dei ban leh tang da ki kali kiba la pynrung kyrteng ha ka Jylla.
U Bah Thomas u la ong ba na ka liang u Under Secretary jong ka Sorkar Meghalaya, u la bthah ïa u Commissioner ka tnat Transport ban leit sha Sikkim ban wad ïa ki jingtip ba bniah halor kane ka rukom leh sha Sikkim ha kaba la lap ba kum kane ka jingpyntreikam ka dang ïaid ha Sikkim ba nym ailad ïa ki kali Tourist kiba nabar ban kamai hapoh katei ka Jylla khnang ba kan wanrah jingmyntoi ïa ki trai muluk.
“Kaei kaba ngi la tyrwa kam dei kaei-kaei kaba thymmai, ngi la pynpaw ba ha Sikkim la pynbeit kumjuh ha kaba, ki kali ki bym shym la register ha ka Sikkim kim shah ban kamai sha ki jaka jngohkai pyrthei,” ong u Bah Thomas.
“Hynrei la pyntip sha ka seng ha kato ka por ba kum kane ka jingpynbeit yn sa leh na ka bynta ka Jylla Meghalaya hadien ba la dep pyndep ïa ka ISBT, Mawïong, Shillong. Hynrei kam shym la don kano-kano ka jingpynkylla hadien kata,” ong u Bah Thomas.
Da kaba pynkynmaw ruh ïa ka jingjia kaba dang shu dep jia shen ha Sohra ïa u Raja Raghuvanshi, u Bah Thomas u la ong ba lada na ka liang ka Sorkar ka la pyntreikam ïa kane ka jingpynbeit kaba la leh kum ha ka Jylla Sikkim, kan khanglad ïa kum kato ka jingjia ba kan wan jia bad kan nym don satia kano-kano ka jingpynbudnam ïa ka Jylla.
“Ka jingkyrpad jong ngi ïa kum kane ka jingpynbeit ka long katkum ka jingbha jingmiat jong ka ïoh ka kot jong ka jaka sah jong ngi bad ka jingsumar bad jingshngaiñ jong u nongjngohkai pyrthei baieit jong ngi,” ong u Bah Thomas.
Shuh-shuh, u Bah Thomas u la ong ba lyngba ki kali ba la pynrung kyrteng ha ka thaiñ ki nongjngohkai pyrthei kin kham shngaiñ namar ba ki trai shnong jong ngi ki long kiba la tip bha ïa ki surok rit, ki kliar lum bad ki jaka ha ka Jylla kumjuh ki nongwan jngohkai pyrthei kin ym jah lynti ne pynlut por khlem da donkam ban pan jingbthah lynti.
U la ong ruh ba ki nongñiah kali jong ngi kiba la register ha ka thaiñ kin long ruh kum ki nongpynïaid ïa ki nongjngohkai pyrthei jong ngi bad lyngba ki kali ba la pynrung kyrteng ha ka thaiñ, u nongjngohkai pyrthei un lait na baroh ki jingshah lehbeiñ bad ki jingshim jingeh ha ka por ba ki wankai shane.
Ka seng ka la ong ruh ba ka jingrai ka Sorkar Jylla ban thied noh da ki bos ban kit ïa ki nongjngohkai pyrthei na kawei ka jaka sha kawei pat, kin long ki sienjam ki ban knieh noh ïa ka lad kamai jong ki nongñiah kali kamai Tourist bad samla trai ri jong ngi.
Da kaba pyntip ruh ba ki ‘Travelling Agency’ kiba don ha Guwahati, Assam ki ai wai ïa ki kali shimet bad ki kali ar shaka sha ki nongwan jngohkai na ka bynta ban wan jngoh ïa ka jylla Meghalaya, kaba long pyrshah ïa ka aiñ bad kam dei na ka bynta ka jingmyntoi jong ka Jylla.
“Kumta ngi kyrpad ïa ka Sorkar ban shim ïa ki sienjam kiba donkam ban ïada na kajuh ka jingjia,” bynrap u Bah Thomas.
