Shillong, Jylliew 24
Ka Ïateilang SC, Laitum-khrah SC bad ka Maw-lynrei SC ki la ïoh jingjop ha ka 4th Division Under-20 Football League 2025 ba la pynïaid da ka Shillong Sports Association (SSA) ha ka Sngi Ba-ar.
Ha kane ka jingïakhun kaba la long ha SSA Stadium kaba ha First Ground, Polo, ka Ïateilang ka la pynliem noh ïa ka New Challenger da 2-1 kol. Kane ka nam jop ka la wan urlong lyngba ki ar kol ba la thep da u Riewdondor Thabah ha ka minit kaba 23 & 67, katba na ka New Challenger la pynphai da u Bisholding Lawai (43) shwa ba kan shah rem.
Ka Laitumkhrah ka la bteng biang ïa ka jingjop kaba ar hadien ba ka la pynliem noh ïa ka Mawnianglah SC da 3-0 kol. Ïa kine kol la thep da u Mebaai Sumer ha ka minit kaba 64, kumjuh u Emerald Sohïong (68) bad u Hamlet Thabah (75).
Haba phai sha kawei pat ka jingïakhun kaba khatduh, ka Mawlynrei SC ka la jop da 4-0 kol ïa ka Riatsamthiah SC. Kane ka kynhun ka la pynkhih jar nyngkong lyngba ka jingïarap pynthep da u rangïalehkai ka liang pyrshah u Wellbert Wahlang ha ka minit kaba 52. Katba ïa kiwei pat la thep da u Ferdinand Pyngrope (53), Elvinson Kharsahnoh (57) bad u Jeffrison Warjri (78).
Kane ka lympung kan bteng biang ha ka Sngi Balang ha kaba ka Summit FA kan ïakhun pyrshah ïa ka Dilingiem SC ha ka por 10:30 mynstep, kumjuh ka Golflink SC ïa ka Mawshubuit SC ha ka por 1:30 mynsngi bad ka Laitkroh SC ïa ka Risa Colony SC ha ka por 4 baje nohphai sngi.
