Jerusalem, Jylliew:
Katkum ki khubor, la iathuh ba 4 ngut ki la khlad na ka jingleit ther bom ka Iran sha ka nongbah Be-er Sheva kaba don sha ka phang Sepngi jong ka Israel ha ka step Sngi Ba-ar, ha kaba ka Iran ka la ther ‘namding sha kawei ka iing sah briew.
La ong ba ka Iran ka la ther ‘namding biang sha Israel wat hadien ba u Myntri ka tnat kam bar ri jong ka Iran- u Abbas Araghchi u la ong ba ka Iran kan sangeh noh ia ka jingiakynad lada ka Israel ka koh-nguh ban leh kumta.
Shuh shuh ruh la ong ba kane ka la jia hadien ba u President ka US, Donald Trump, u la pynbna ba ka jingiateh soskular ban sangeh iasiat hapdeng ka Iran bad Israel, ka la sdang ban treikam. Ha kajuh ruh ka por, u Trump ha katei ka sngi u la maham ia baroh arliang ri ba kim bit shuh ban dang thaw ne pynmih jingkulmar ne thaw jingiakynad biang nalor kane ka jingiateh soskular namar kan long ka jingpynkheiñ aiñ bad ka jingpynkheiñ ia katei ka soskular ba la dep ban iateh.
U President ka United States, Donald Trump, haba ai jingkren sha ki lad pathai khubor jong ka Washington, u la pynpaw ba u khmih lynti ba katei ka jingiateh soskular hapdeng ka Israel bad Iran kaba la pynbna ha ka Sngi Nyngkong, kan long kaba neh bad ka ban wanrah jingsuk shyrta.
U la pynpaw ruh ia ka jingsngew skhem ba ka jingiateh soskular ban sangeh iasiat hapdeng kitei ki arliang ri kan long kaba neh, ha kaba u la ong ba u sngewthuh ba kane ka jingiateh soskular ka long kaba skhem bad ka ban neh shi junom.
